الحجوبي: شباط هو مول الفعلة وشرا الكاسيط ب7 دالمليون وها علاش بغى ينتقم مني

لالة خديجة الحجوبي، مديرة الحملة الانتخابية لحزب الحركة الشعبية بفاس التهامي العكبي الشومي، واش انتي هي السيدة اللي باينة فالفيديو؟
هاداك الفيديو دارو فيه المونتاج ولعبو على اللون الأخضر وراه العرس قديم بزاف كان ف1994.

يعني السيدة اللي كتبان فالفيديو ماشي انتي؟
العرس اللي كيبان فاللول قديم، ولكن زادو فيه بلاطو الشراب ولعبو على اللون الأخضر.

وعلاش دارو ليك هاد الشي
حقاش كنخدم فالمجتمع المدني وما عمرني انتميت لحزب سياسي ومعروفة ففاس.

ولكن دابا مع الحركة الشعبية؟
أنا ماشي مع الحركة الشعبية أنا مع التهامي العكبي الشومي حقاش هو اللي ما كيسدش التلفون ديالو. عندي شبكة ديالي وكنت باغية نكون مع الوزير الاتحادي (أحمد الشامي) ولكن ما كيجاوبش.

وشكون اللي كيشن عليك هاد الحملة ودار هاد الفيديو؟
دابا أنا كنعمل فلجنة لمحاربة الرشوة، ومن النهار الأول ديال الحملة وأنا حاضية الخروقات. النهار اللول لقيت زوجة الحداد رئيس مقاطعة المرينيين (في لائحة شباط) وزوجة شباط كيحيدو الزبل من الحي، علمت بيهم الباشا والسلطات، والنهار الثالث للحملة زوجة شباط فسيارة للإسعاف، حيحت عليهم لأنه استغلال لأملاك الدولة فحملة انتخابية، فنفس النهار خرجوا هاد الفيديو.

يعني كانوا باغيين يتهناو منك؟
شباط خايف مني بزاف، وحنايا راه محركين بزاف فالمجتمع المدني، منوضين ليه الصداع بزاف وعندنا معاه صراع طويل. باش بغى يرد دار هاد الفيديو.

يعني انتي كتهمني مباشرة شباط باللي هو اللي دار الفيديو؟
هو اللي دارو طبعا وحتى انا خديت فيديو فيه مراتو كتشطح ولكن ما خرجتوش.

وباش عرفتي باللي شباط هو اللي ورا الفيديو؟
حقاش استعمل نفس الطريقة ففيديوات سابقة، دارها مع أمغار (من الأصالة والمعاصرة) ومع ناس العدالة والتنمية. نفس التقنية ونفس التعابير ونفس الكتبة. عرضنا هاد الشي على رجال قانون، وغادي نتقدم بشكاية ضد مجهول غد الثلاثاء. أنا ماشي اللي كنشطح. هاد الشطيح ماشي ديالي. وكلشي اللي كيتصلو بي عارفينها.

وشكون غادية تتهمي؟
غادية نسجلها ضد مجهول ونفس الشيء غادي يديرو وكيل لائحة السنبلة التهامي العكبي، وحتى أمغار واللقماني من البام غادين يقدموا شكاية ولكن ضد شباط مباشرة.
هاد الفعلة دارها شباط حقاش هادا هو أسلوبو، حنا كنا باغيين حملة نظيفة ماشي موسخة بحال هاكا.

نعاود نسولك وعلاش كتهمي شباط؟
أنا بحثت وعرفت كيفاش خرجات هاد الكاسيط. جبداتها ليلى، صاحبة زوجة شباط اللي كنت شوهتها فملف الدعارة الراقية. هي اللي شرات الكاسيط.

من عند من شراتها؟
من خدامة كتشغل عند واحد السيدة كبيرة فالسن. استغلات بنتها اللي عايشة ففرنسا، وجابت ليهم الكاسيط ديال واحد العرس تنظم ف1994، وعرفت باللي خدات فيه 7 المليون.

واش غادية تأثر على سمعتك وعلى الحملة؟
كلشي كيعرفني راني حجيت جاتني دعوة من الأميرة نور بنت الملك فهد، الناس كلشي كيعرفني. بالعكس هاد اللي كيصحب شباط غادي يشوهني عاوني بزاف، بزافت الناس كيساندوني.