واش المكلفين بحراسة محمد السادس يحنون الى عهد الحسن الثاني؟ اللي حط طونوبيلتو فشارع الزرقطوني ما يلوم الا راسو. ساعات قبل صلاة الملك فمسجد الحسن الثاني حالة استنفار اعتقدنا انها ولت -صورة

صباح اليوم الجمعة عاينت "كود" حالة استنفار بواحد من اهم شوارع الدار البيضاء الا وهو شارع الزرقطوني، اذ تم منع ركن السيارات في الجهتين معا والساعات الاولى لهذا اليوم، كما عاينت "كود" تواجدا مكثفا لرجال الامن. البوليس ماشي مشكل ولكن منع ركن السيارات فهاد الشارع من الصباح ما عندو معنى "ياكما رجعنا لعهد الحسن الثاني اللي كان قبل ما يدوز بعشر سوايع توقع حالة استنفار" يقول احد المواطنين المتضررين من هذا القرار "والملك ديما كيدوز ووسط الزحام وما كانوش كيمنعونا نستاسيونيو" يضيف المواطن ل"كود"
علاش هاد الهايلالا كلها؟ حقاش الملك غادي يصلي فجامع الحسن الثاني صلاة الجمعة اليوم وشارع الزرقطوني هو اللي كيدي مباشرة تقريبا من القصر الى المسجد. بعض المواطنون كاعيين ماشي على الاجراء ولكن على الطريقة "يمكن نتفهمو بانه على قبال الامن ديال الملك هاد الشي خاصو يدار ولكن علاش ما خبروناش وكالو لينا سواء مجلس المدينة او الولاية فوسائل الاعلام اللي كثيرة ومتنوعة، البارح واليوم ما كانتش غادية توقع لينا مشاكل، راه اكثر من ساعة وحنا ندورو باش لقاو بلاصة وهاد الشي عيب وحشومة" يوضح احد البيضاويين ل"كود"
مجلس المدينة اليوم صبح حادك غير فالتشطاب فمنذ التاسعة وزع عشرات العمال مهمتهم تنظيف جوانب الشارع باش يبان زوين ونقي الوقت اللي يدوز منو الملك