سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
واحد فبلادو كيمارس العنصرية على الكوحل وعلى الاقليات الدينية والجنسية وكيعجبو الحال يشوف مثلي فالزنقة كاياكل سلخة ماشي من حقو يتشكى حيت فرانساوي صوت على اليمين المتطرف
المغاربة و بحكم القرب التاريخي و الاقتصادي مع فرانسا كايبقاو مهتمين بالاخبار ديال ديك البلاد ! كاينين طبعا دوك صحاب الاتجاه المعاكس لي كايبغيو يكونو ضد التيار غي باش يبانو راهم زعما مختلفين ! صحاب " و حنا مالنا و مال فرانسا" ! " و مال فرانسا تاتسوق لشطاري عندنا؟" ! طبعا ابوعو لي واقع ففرانسا كايأثر بشكل او بآخر على بلادك !فرانسا راه أول شريك اقتصادي للمغرب و أول مستثمر ! بلا مانهضرو عليها كدولة عايشين فيها بزاف ديال المغاربة و معيشين بفلوسها عائلاتهم هنايا ! و اول وجهة للطلاب المغاربة و زيد و زيد ! ايوا ؟ نسدو على فرانسا و نبقاو مقابلينك نتا ؟ مانتسوقوش لخبار فرانسا و نتسوقو لخبارك نتا ؟ طبعا داكشي لي كايطرا تما كايقيس المغرب و المغاربة و الجالية. آخر خبر جانا من فرانسا هو ديال الانتخابات الاخيرة ! ردة الفعل ديال المغاربة مع القضية ديال النتائج الكبيرة لي حصلات عليها الجبهة الوطنية (اليمين المتطرف) ففرانسا بينات على واحد الازدواجية فالتفكير خطيرة ! حيت لا يعقل انو المغربي لي كايصوت على حزب محافظ حيت بالنسبة ليه حزب ديال قال الله قال الرسول ! غايحيد les boites و يمنع الشراب و يحارب "الفسق و المجون" ! المغربي لي كايصوت على حزب محافظ حيت بالنسبة ليه داك الحزب المحافظ راه كايحافظ على قيم المجتمع المغربي لي هو كايتخيالها يجي يتشكا حيت فرانساوي صوت على اليمين المتطرف لي تاهو باغي يحافظ على قيم المجتمع الفرنسي ! عادي ! الحجاب فالمدارس ماشي من قيم المجتمع الفرنسي من حقهم يرفضوه! الخمار فالزنقة ماشي من قيم المجتمع الفرنسي و les cantines halal ! و les piscines non mixtes ! اابيسينات ديال الرجال بوحدهم و العيالات بوحدهم لي كايطالبو بيهم شي وحدين ففرانسا ماشي من قيم المجتمع الفرنسي هادوك قيم ديالكم نتوما شدوهم و ديرو بيهم لي بغيتو و لكن ماتكعاوش حيت واحد فرنسي صوت على حزب باغي يحافظ على القيم ديال المجتمع الفرنسي ! حيت الفرنسي تاريخيا هو انسان من جنس ابيض كاياكل الحلوف و كايضرب الطاسة و كايمشي لبيسين يعوم مع العيالات و الرجال… مايمكنش نتا كاشخص تعيب على اليمين المتطرف الفرنسي حيت " ماكايحملوش المسلمين" و نتا مازال كاتقول على ليهودي"حاشاك" ! و كاضحك على النصراني حيت قالك الله عندو ولدو ! و كاتجيك فشكااال الهندوسيين لي كايعبدو البقر و على البوذيين لي كايعبدو بوذا … مايمكنش تتشكى من اليمين المتطرف الفرنسي و تقول عليهم " عنصريين" ماكايحملوش العرب ! مابغاوناش ! و نتا اكبر عنصري ! فينما يبان ليك شي عزي تقوليه " تفو عمرتو البلاد" " ضسرتو علينا " ! تاتشكا من عنصرية اليمين المتطرف دياال فرانسا و نتا مازال عندك فبلادك شيفورات د الطاكسيات ماكايهزوش عوازة ! و ناس بعقلهم كايرفضو يكريو ليهم الديور علاش؟ حيت عوازة فيهم ‘شي ريحة'. مايمكنش تطالب الفرنسيين يديرو الفرق بين واحد مسلم داخل سوق راسو و واحد مسلم داعشي و ماحطوش كلشي فسلة وحدة و نتا كاتشوف كاع عوازة خانزين و مصننين ! فحال السعاية ديالهم فحال الحراكة ! الطلبة! البعثات الديبلوماسية … كلهم فحال فحال بالنسبة ليك !ياك كلهم " افارقة" نتا براسك ماكاديرش الفرق بين السفير ديال السينيغال و حراك باغي يمشي لمليلة بالنسبة ليك كلهم عوازة ! و كاتشكى حيت اليمين الفرنسي ماكايديرش الفرق بينك و بين داعش ! تا هوما بالنسبة ليهم كلكم مسلمين و كلكم عرب! فحال السوري فحال اللبناني فحال المغربي فحال السوداني… كيما نتا عندك كي السينيغالي كي الكاميروني كي الافواري كلهم "عوازة مسخين"! واحد متطرف فبلادو!ماشي من حقو يعيب على الناس المتطرفين فبلاداتهم ! واحد مازال كايمارس الاقصاء و العنف على الاقليات الدينية و الجنسية و العرقية فبلادو ماليها تا معنا يطالب واحد فرانساوي باش مايصوتش على اليمين المتطرف … هادي هي ديال الجمل لي شاف حدبت صاحبو!
