مزوار مازال كيتهرب يواجه بنكيران وكيراكم الاخطاء. الفعفاع عندو منتدى افريقي عادي اهم من مجلس حكومي ناقش علاقتنا الاستراتيجية بالاتحاد الاوربي ولفضيحة لكبيرة مشى من بعد فالرباط

الوزير الفعفاع اللي ما بقى صالح حتى لشي حاجة صلاح الدين مزوار تالف هاد الايام. غادي ويراكم الاخطاء. البارح الخميس فضل حضور الدورة الرابعة للمنتدى الدولي "إفريقيا والتنمية" اللي منظماه "التجاري وفا" على اجتماع المجلس الحكومي اللي كان فالرباط. صحابو كالو ل"كود" راه ما يقدرش يمشي من الدار البيضاء للرباط ويوصل قبل الحادية عشر. كذوب. اولا مزوار جا للاجتماع وما كان موجد والو. دار خطاب فارغ عامر انشاء، كيبين باللي ما هيأ لا كلمة لا افكار وهو كال بعظمة لسانو "سمحو لي معطل وما موجدش"، وعلاش جاي ايلى كنتي ما موجدش يا سيدي. ثانيا المنتدى بدا مع العاشرة ودار كلمتو هو الاول، يعني عندو الوقت الكافي يمشي للرباط ويحضر للمجلس الحكومي، ثم ان وزير الفلاحة والصيد البحري عزيز اخنوش تكلم من بعد ومشى للرباط وحضر للمجلس الحكومي ودار عرض تماك. الامر الاخر المثير هو ان مجلس الحكومة ناقش علاقتنا بالاتحاد الاروبي واصدر بيانا قويا، وقد قدم كلا من ناصر بوريطة الوزير المنتدب في الخارجية وعزيز اخنوش تقاريرهما، يعني ان مزوار كيفضل منتدى عادي على اجتماع يهم المغرب ومستقبله.
الوزير الففعاع تالف هاد الايام، بقى يدور فالمنتدى ومن بعد مشى للرباط باش يتلاقى مع المبعوث الاممي الى الصحراء روس مع لطناش ونص. اي بعد ما سالى المجلس الحكومي. حتى روس شافو فاخر لخطة لانه التقى الثلاثاء الماضي ببوريطة.
مزوار من نهار سب حكومة بنكيران وهو هربان ما باغيش يحضر للمجالس الحكومية وكل مرة ومبرر. على هاد لحساب استقال وغادر الحكومة ايلى ما كنتي كدير والو