ها كاوا مزوار الفعفاع باغي يدير المعارضة للحكومة اللي فيها: شكون دفعو يخرج عينيه فبنكيران فقضية الامازيغية

اللي كيعرف حزب التجمع الوطني للاحرار واللي كيسيروه بصاح ماشي اللي فالتوجيهة ما يمكنش يصدق بيان مكتبهم السياسي اللي تعقد البارح 19 يناير 2016. اولا هاد الحزب حتى اجتماعاتو كيديرها غير الوقت اللي كيتطلب منو وصافي. كاليك اسيدي المكتب ترأسو الوزير الفعفاع صلاح الدين مزوار. كاليك اسيدي ترحمو على روح الفنانة ليلى العلوي اللي ماتت فتفجيرات بوركينا فاسو ورجعوها مناضلة حقوقية.
ولكن المثير هو هاد العبارة " تدارس الاجتماع المستجدات على الساحتين الوطنية والحزبية، ووقف مطولا عند عدد من المؤشرات التي تعكس احتقانا اجتماعيا متناميا. كما سجل المكتب السياسي في تتبعه للعمل الحكومي وتفاعله مع المجتمع، أجواء الاستياء التي تعبر عنها أصوات اجتماعية ومدنية وازنة حول عدد من الملفات، من ضمنها ما يتعلق بتهييء مشروع القانون التنظيمي لتفعيل الطابع الرسمي للأمازيغية". يعني الحزب اللي ما ما عمرو خدا شي قرار سيادي وديما كيكولو ليه اش يدير ولى بين عشية وضحاها معارض للحكومة.
وباش يقلل من هاد المعارضة حقاش ما مولفاش اضاف " أكد المكتب السياسي على ضرورة التهدئة وتغليب روح الحوار وفضيلة الإنصات والبحث عن التوافقات إحقاقا للعدل والإنصاف، وصيانة للاستقرار والسكينة والطمأنينة".
اللي عرف شكون عارض القانون التنظيمي لتفعيل الطابع الرسمي للامازيغية غادي تفهمو علاش هاد الحزب هدر وشكون اللي دفعو يخرج.
هاد الحزب ما كال والو على قانون خطير بحال قانون الصحافة والنشر وحل فمو فهاد الموضوع