كيفاش تحول بيان الداخلية والمالية لشوهة وولى حصاد وبوسعيد فلاسفة: مضمون بلا خبار رئيسهم فالحكومة واستياء شعبي واحساس بالحگرة بسباب "خدام الدولة"

التواصل فن ماشي اي واحد يقدر يديرو. الداخلية والمالية دارو زبلة كبيرة تقلبات عليهم ببومزوي وضراتهم اكثر. بغاو يشدو فالعدالة والتنمية الساعة تقلب عليهم كلشي. لعدة اسباب:
اول خطأ جا فالبيان المشترك بين الداخلية والمالية هو عوض تقديم مبررات منطقية جرو عليهم انتقادات الصحف والاحزاب. جاء في البيان "انخراط حزب سياسي والمنابر الاعلامية التي تدور في فلكه في "الحملة المغرضة" ضد والي جهة الرباط سلا القنيطرة بخصوص شراء قطعة أرضية تابعة للملك العمومي أمر "يبعث على الاستغراب". حسب الداخلية والمالية فان "لكم2″ و"كود" و"هسبريس" بلا ما نزيد مواقع اخرى كندورو ففلك هاد الحزب السياسي. هاد الشي كيضحك لان اللي كتبو ما مصدقش هاد الهدرة.
ثانيا: اقحام حزب سياسي في اشارة الى العدالة والتنمية اللي وجهات سؤال لوزير المالية في هذا الموضوع زادو فكرة "استهداف الحزب".
ثالثا: رئيسهم فالحكومة كما صرح ل"كود" "ما فخباروش" مضمون البيان. كالو ليه غاديين يشرحو فبيان القضية للرأي العام وخرجو مضمون يستهدف حزب بنكيران.
رابعا: التبرير اللي ساقوه ماشي غير ماشي مقنع بل ولى ضحكة كبيرة. هاد العبارة منذ نشر البيان وهي حديث الداني والقاصي في العالم الازرق الفايسبوك وحتى فالقهاوي والديور والصالونات. البيان جاب مصطلح جديد وهو "خدام الدولة" كال البيان "توضيحا وتنويرا للرأي العام بخصوص المزاعم والاتهامات المغرضة الموجهة" ضد الوالي، أن هذه القطعة الأرضية جزء من تجزئة سكنية، مخصصة لموظفي وخدام الدولة، منذ عهد المغفور له جلالة الملك الحسن الثاني، طيب الله ثراه.
خامسا: ضعف البيان هو انه يتحدث عن الوالي لفتيت 1995 اي هادي 21 عام . اش من منصب كان عندو ديك الوقت باش يستافد من هاد التجزئة.
سادسا: الداخلية والمالية تحولو لمدافع عنه: كالو على لفتيت راه مسؤول سامي مشهود له بالكفاءة وبالحرص على خدمة الصالح العام" شكون يشكرك يا لعروسة. كيفاش الداخلية كتشكر فالداخلية ومعاها وزير المالية اللي كان والي فاكادير وفالدار البيضاء اي انه دوز سنوات فالداخلية. شهادتهما فيها تجريح وما يمكنش يصدقها حد. صورة لفتيت عند الرأي العام مختلفة. متفجرف. صورته مع مواطن مغربي باغي ياخد شي براكة التقضية فرمضان من عند الاماراتيين كتعطي صورة لهاد الشخص
الداخلية والمالية زبلوها بزاف. شوهو بهاد البيان التاريخي تخلصه تدوينة للصحافي علي انوزلا "ثمة "خدام الدولة" و"عبيد الدولة" و"رٌعاع الدولة" و"هَوَامٌ الدولة". ثم انهاها "شكرا لفيلسوفا الحكومة "حصاد" و"بوسعيد" لأنكما ذكرتمونا بالتقسيم الجديد القديم لسكان مدينتكما "الفاضلة" جدا".