الله يغبر ليوكم الشقف: ودابا كولو لينا كيفاش ما يفكروش مغاربة بنظرية المؤامرة ضد بنكيران. كيفاش مسخات احزاب وكيفاش طلعات اخرى وكيفاش بياناتهم كتشابه

كلشي كيدار لعبد الاله بنكيران رئيس الحكومة المعين هاد الايام كيزيد غير يقويه ويقويه. المخرج ديال هاد المسرحية طلع غبي بزاف. فين ما كيقرر يضربوه كيتقوى كثر. كلشي عبثي فعبثي. عينهم يقضيو عليه ويضرو حزبو وكل نهار كيعطيوه قوة وكيزيدو يضاعفو قوتو.
اللي شاف بيان هاداك الحزب التافه اللي فالعمق كيضر الديموقراطية فالمغرب ما كيعاونهاش اللي هو الاتحاد الدستوري وقرا بيان حزب الاتحاد الاشتراكي مع الحضيض اللي وصل ليه مع ادريس لشكر كيخرج بقناعة وحدة. ان البيانين بجوج دارتهم جهة وحدة. واش حتى فهاد الامور لبسيطة ما عندهمش ابداع. ما عندهمش خيال.
بغاو يطيرو الاستقلال وشباط خرج عليه فمو وطار ولكن ما عمرهم دارو فحسابهم ان الاستقلال غادي يدعم الحكومة. يعني حساباتهم ضربات فزيرو. دابا كاليك يدخل الاتحادين الاشتراكي والدستوري.
تلات بحزب بنبركة حتى ولى كيفوض الاحرار باش يدخل للحكومة. كلشي كيعرف موقف الاتحاديين من احزاب "الكوكوط مينوت" ايام ماشي قديمة بزاف.
ايها الاغبياء اللي كيديرو هاد المسرحية وكل نهار كترتاجلو مشاهد راكم تسيئون للديموقراطية للمغرب لمستقبل المملكة وكل نهار كدعمو بنكيران