شكون يحامي على القناصلة؟ بعد ما قصفهم الملك فخطابو ولاو كيمرمدو بيهم وكيهرسوهم كاع وها للي وقع فلقاءهم فالخارجية

عقد وزير الخارجية والتعاون ناصر بوريطة لقاء مع قناصلة المغرب في قنصلياته بالعالم اليوم السبت 19 غشت 2017 بمقر الخارجية بالرباط. اللقاء حضر ليه الوزير المنتدب المكلف بالهجرة بنعتيق وما عرفناش اش داه يحضر.
اللقاء التواصلي جا فوقت كياكلو فيه العصا بزاف القناصلة فعدد من المدن خاصة الاوربية من قبل مواطنيهم المغاربة "هادي عامين ولينا ضحية اعتداءات وما نقدروش حتى ندافعو على ريوسنا من مواطنين كلشي باغينو بالزربة" يحكي قنصل ل"كود". اللي حشم يقولو هو انه بعد الخطاب الشهير ديال الملك اللي هاجم بزاف بزاف على القناصلة وهما مسخسخين. الخطاب ما كانش منصف ليهم وجمعهم فسلة وحدة وعطاهم بحال ايلى ما كيديرو حتى حاجة والحال ان المشكلة هي مشكلة ادارة مغربية كلها وثقافتها المتخلفة ماشي غير عمل قنصلي او غيرو.
دابا تزاد خطاب جديد هو ديال عيد العرش اللي قالو رئيس الدولة ف29 يوليوز الماضي. اللقاء وفق مصدر من الخارجية دار " تماشيا مع التعليمات الملكية الواردة" فهاد الخطاب.
الوزير وفق مصدر ل"كود" طلب من القناصلة "يسمعو ويتجاوبو مع شكايات وطلبات المواطنين" مع"خلق مفهوم جديد لعلاقة المواطن مع القنصلية".
كما طلب منهم "تحسين الخدمات القنصلية (جودة الاستقبال، إحترام الآجال بالنسبة للملفات والوثائق الإدارية)" و"مواكبة تطلعات مغاربة العالم تجاه بلادهم".
وفق مصدر "كود" فان الوزير دعاهم الى "متابعة الملفات بشكل يومي وعدم قبول أي تجاوز للآجال القانونية دون مبرر ودون إخبار المعني بالأمر" و"ربط المسؤولية بالمحاسبة، كل قنصل مسؤول مسؤولية تامة أمام الوزارة" وحذرهم من ان "أي خلل في التسيير سواء المتعلق (بالإبتزاز أو الرشوة..) سيتم أخد الإجراءات القانونية الحازمة ضد كل متجاوز (صفر تسامح)".
دابا هاد الشي مزيان وخاصو يكون ولكن حماية القناصلة بحال اللي تعرض ليه هشام دحان اللي هو قنصل بالميرية الاسبانية يوم 28 يوليوز اي قبل عيد العرش من قبل مواطن اللي هرس ليه يدو شكون يدافع عليه. شكون يدعمو. مواطن بغى باسبورو وباين تزايدو فالهدرة هرس ليه يدو ودخلات الشرطة الاسبانية على الخط.