كيفاش قولباتنا وزارة الخارجية وكيفاش قولب المكلف بالتواصل اللي لابس منصب كبر منو الصحافيين ومزوار وخلى فابيوس يتبورد

السيد كريم مدرك اللي مكلف بالتواصل فوزارة الخارجية كيضحك على الصحافيين بالاضافة الى انه كيدوز لخبار بالتخبية لصحابو دار البارح شوهة فالندوة الصحافية لصلاح الدين مزوار وزير الخارجية المغربي ونظيره الفرنسي لوران فابيوس. نبداو من الاول باش تفهمو الشوهة. الخارجية اتصلت بالصحافيين لاخبارهم بموعد الندوة. كانت تغييرات مرة فالعشية مرة فالصباح. هاد الشي مفهوم حقاش كان فابيوس خاصو يتلاقى مع الملك وهاد اللقاء هو اللي حدد موعد الندوة الصحافية. واخا التسخسيخ ولكن تسخسيخ مفهوم الى حد ما فامور بحال هادي والخارجية المغربية ما كتحملش بزاف المسؤولية.
المهم الصحافيون جاو وبزاف لندوة مهمة بزاف. ديال وزير خارجية دولة تقطعات معاها اشكال التعاون القضائي والامني بشكل تام تقريبا مدة سنة. سنة من الجفاء فكان طبيعي ان يحضر ذلك العدد من الصحافيين. قبل ان تبدأ الندوة كان ذالك الشخص المكلف بالتواصل مدرك يدور فراسو يعطي التوجيهات وفنفس الوقت كيوزع على اش من صحافي غادي يوجه السؤال. باش بدات الندوة اللي كان فيها غير لغة الخشب وما جا فيها والو وبداو يعودو لينا "العلاقات حميمية" رجعات بين المغرب وفرنسا كيف ما كانت" وبلا بلا بلا بلا بلا٬ تخبى ذاك الشخص ورا واحد البودرة باش ما يشوفوكش كلشي الصحافيين. كان اول سؤال لصحافي يجلس في الصف الاول. لم يكلف نفسه حتى التحرك كي يسمح لنسبة من قليلة من الصحافيين بطرح الاسئلة. لم يتعد عدد الاسئلة 5 وترك عشرات الصحافيين انتظروا لساعات لان ذلك لا يستهويه.
احتجت "كود" عليه وسط القاعة لانه اظهر مكرا وهذا المكر خرج فيه. حقاش شكون اللي بان رابح من هاد الندوة هو فابيوس حقاش كان مرتاح حتى سؤال ما قلقو ما استفزو ما حرجو فيما سؤال الصحافي الفرنسي حرج مزوار حقاش جبد ليه حوارو ف"جون افريك" اللي انتقد بشدة فرنسا. ،النتيحة. تصرف هاداك الشخص كان ضد الوزير ديالو وفصالح الوزير الفرنسي. كان يمكن تسيير الندوة الصحافية بطريقة اخرى لكن هاد الموظف لمخزني اللي مولف غير بالاعلام العمومي كان له موقف اخر. هاد السيد كبيرة عليه ادارة التواصل فالخارجية اللي فيها رجال ونساء فيديهم ومزيانين وكيعرفو خدمتهم . يمكن تعيينو قنصل فباماكو ولا شي دولة افريقية اخرى تجي على قدو