بالصور= اللا يا سيدي احتجاجات الحسيمة سياسية 100 بالمائة ومطالبهم ماشي غير صبيطارات وشغل والانفصال كاين غير اللي بغى يسد عينيه

دابا ضحكني ربورطاج "دوزيم" اللي دارتو على مسيرة امس اللي عرفتاها الحسيمة. "دوزيم" كيف ديما كتوهم لمغاربة ان هاد المسيرة الكبيرة جدا فيها مطالب اجتماعية صرفة. جابت ابناء المدينة اللي كيطالبو بالكرامة بالشغل بالصحة. اييه هادوك اللي كيتكلمو غادين يكونو صادقين. المشكلة انهم ما كيمثلوش الجناح اللي كيقود الحراك فالريف. اللي كيقودو هو ناصر الزفزافي اللي كان على خلاف كبير مع بعض اللي دوزاتهم دوزيم" مثل الناشط الجمعوي مرتضى اعمراشن. هنا كيبان انها قناة مشات دير خدمة اخرى غير الخدمة اللي خاصو يقدمها المرفق العمومي للمواطنين دافعي الضرائب كما هو معمول بها في دول تحترم هذا المواطن.
"دوزيم" اي الدولة حيدات الزعيم اللي كيحرك هاد الحراك وما بينات حتى صورة ليه. كذبات علينا باش قال صاحب الربورطاج "تحقيق مطالب اجتماعية صرفة" وترديد "شعارات ذات طابع اجتماعي تنموي" وان صقفها "اجتماعي" وانها للاحتجاج على الموقف الحكومي "غير الملائم". شفتو الدولة شحال ضربات من عصفور فهاد الربوطاج.
علاش صور دوزيم كتكذب كلام الصحافي المرفق للربورطاج؟ فالمدن المغربية كلها اللي فيها هاد النوع من الاحتجاج ما كيرفعوش راية الامازيغ وراية جمهورية عبد الكريم الخطابي. ايلى لاحظو فربورطاج دوزيم" الراية المغربية الوحيدة اللي كاينة هي اللي معلقاها الدولة فبوطو ديال الضو وخداو مشهد كيبين فيه هاد الراية مع جزء من المسيرة. يعني كيغلطو الراي العام مرة اخرى.
حتى الزفزافي اللي كيكرر شحال من مرة ان مطالب الحراك اجتماعية ماشي انفصالية او او او ما كيكولش الحقيقة كاملة. حقاش حتى فالقسم اللي دارو فشعاراتو ما كاينش كلمة "آلمغرب" كاع. كاين غير الريف عاش الريف ابناء الريف. خطاب ماشي وحدوي ماشي مغربي.
مسيرة البارح ما كانتش للمطالب الاجتماعية ما كانتش للمطالبة بالسكن بالصحة بالشغل. يمكن كان مطلب الكرامة في بعده السياسي حاضر من غير هاد الشي راه غير كنوهمو ريوسنا بترديد "المطالب الاجتماعية" حقاش ايلى جينا لهاد الشي الحسيمة راها متقدمة بزاف بزاف بزاف على مدن مغربية كثيرة وما كيخرجوش يديرو ربع اللي داروه ناس الريف.