وفينك اوزير حقوق الانسان. راه خرق للقانون اعتقال مول الفيراري والشامبانيا والتبرير ما شادش. كيفاش تسبب في ارتكاب حادثة سير وقعات هادي يومين ودار فيها محضر. راه اخطر ما يهدد البلاد كذلك هو دير خاطر للشعب على حساب القانون

اعتقال مول الفيراري والشامبانيا او توقيفه كما جاء في بيان المديرية العامة للامن الوطني ليلة امس ما عندو لا ساس لا راس. هاد الشي ديال البحث القضائي بخصوص حادثة سير وقعات صباح الاثنين ما شاداش.
دابا علاش غادين يشدوه. فالبيان قالو "أنه تم فتح بحث قضائي مع المعني بالأمر بتعليمات من النيابة العامة المشرفة على البحث، وذلك بغرض تحديد جميع الظروف والملابسات المرتبطة بالحادثة". المشكلة ان هاد الشي جا بعد ما شعل المغرب فمواقع التواصل الاجتماعي وكلشي كيردد شدوه شدوه. فالاول شدو البوليس ومن بعد طارو عليه.
الادارة العامة تبحث مع امنها على ما وقع عادي جدا باش تعرف واش اللي دار كولو قانوني ولا اللا ولكن علاش يشدو الدري واش من تهمة غادين يوجهوها ليه خاصة ان كلشي دار فيه محضر وتطلق. ممكن يكون المشكل فالمحضر وهادي ماشي مشكلتو هو. على السكر. ما عندهم حتى شي دليل والفيديو ماشي دليل ادانة لان البوليس دار المعاينة.
قانونيا التوقيف او الاعتقال راه دار حقاش الشعب حيح ماشي حقاش القانون كيقولها. ونهار يطبق القانون ارضاء للشعب قودناها. راه الدواعش غادين يحكمونا كيف حاولو بعض المرات ولا ما كانوش الدواعش يحكمونا الرعاع. هادا موضوع مزيان يبدا بيه وزير الدولة المكلف بحقوق الانسان. يشوف مدى قانونية هاد الشي كلو