على هامش قضية الفيزازي و حنان: واش الدولة مازال ماغاديش تتدخل ضد هاد الشعوذة و النصب المسمى رقية شرعية؟

—
فأي مدينة وأي حي شعبي كاينين ماحالات للرقية الشرعية ، برطمات أو كاراجات فيهم قاعة استقبال ، وغرفة للعلاج عبارة على بيت عازل للصوت فيه كيقراو هاد الرقاة القرآن على المرضى وكيبداو يسلخو فيهم حتى يخرج الجن ، هو منطقيا هاديك السلخة راه تخرج العقل ماشي غير الجن وبلا قرآن ، ولكن ملي كيتزاد ليها القرآن كتولي سلخة شرعية وعنف مبرر اتجاه مريض الجهل وقلة شي فبعض الحالات خلاتو يجي عند بحال هاد الناس باش يداوا ، والأدهى من هذا أن أغلبهم ولاو مشاهير فالويب المغربي وعندهم صفحات على الفايسبوك بألاف المتتبعين وعندهم قنوات على اليوتوب ، فيها فيديوات ديال عمليات لخراج الجن ، معنونة ب: شاهد كيف أخرج الراقي الشرعي أبو فرتلان الجن اليهودي ( وكلنا عرفنا هاد الجن بالظبط كيفاش كيخرج هاد ليام).
المسألة فهادشي هو أنه حنا أمام نشاط غير قانوني راه شعوذة ودجل ونصب وإحتيال ، حيث شحال من واحد كاتب فواجهة المحل ديالو علاج جميع الأمراض النفسية ، علاج الشقيقة علاج منعرف شنو بالقرآن والرقية الشرعية ، وحاليا تماداو وولاو كيصورو هاد عمليات النصب وكيسوقوها على أنها عمليات علاج ناجحة ، وكتبان شي أخت بالنقاب كتعاود على كيفاش جات مريضة عند الراقي ومن بعد عدة جلسات ولات بيخير الحمد الله " واش بالقرآن أو حاجة خرى الله وأعلم"، وطبعا نتيجة مثل هاد الإنتشار الواسع والخروج للعلن والمجاهرة بالجريمة ، هو أنه كل مرة ولينا كنسمعو راقي شرعي اغتصب متزوجة ، فضيحة خيانة زوجية ، وعدة فضاح جنسية من هاد النوع ، ومن غير الفضائح الجنسية كاين بزاف ديال الأحداث الأخرى لي كتطرى ، ومنها فبعض الحالات كيكون شي حد فيه مرض نفسي لي ربما ساهل يتعالج عن مختص كيولي مقودها على راسو بداك لعصى والقرآن وداك الأجواء القروسطية لي باقا غير فأفلام هوليود ، ديال الخلعة.
ديما كنسمعوا على مداهمة الشرطة لقهوة ديال الشيشة أو كيشية ديال الحشيش ، أو وكر للدعارة ، أو واحد هو وصاحبتو فدارهم ، ومع ذلك عمرنا سمعنا مداهمة رجال الأمن لمحل ديال راقي شرعي بلا ماتكون أصلا وقعات شي جريمة لي تستدعي الأمر ، يداهموه غير حيث ماحال ديال الرقية الشرعية ، أي ماحال ديال التادجالت والنصب والإحتيال وانتحال صفة ، حيث أغلبهم دايرين فيها أطباء نفسانيين وأطباء ديال الأمراض العقلية كيداويوها بالقرآن وبالماء ديال زمزم مقري عليه القرآن ، هادشي راه ولا تجارة مربحة وراه غير قانوني بالمرة وكل مرة كنسمعوا جرائم كتوقع عندهم فمحالاتهم ومع ذلك الدولة باقا كاع ممسوقة ليهم ، واش حيث معاونين معاها على المرضى النفسيين والعقليين فعوض تتكلف بيهم هي مكلفين بيهم هوما ، راه قريب شي نهار نلقاو فشي لائحة ديال المرشحين للإنتخابات شي مرشح سميتو الراقي الشرعي أبو عمر ، حيث بصح هاد المهنة لي مبنية على النصب والإحتيال والدجل غادا وكتواي مهنة محترمة فالمغرب وناسها عندهم قيمة اجتماعية ، غير حيث الدولة ميكة عليهم .