الهدوء يعود لدرب لكبير فكازا بعد ليلة مواجهات بين مهاجرين وكازاوا والعنصرية تزحف على عقول المغاربة =بالصور

هناء ابو علي ربورطاج صور: ايس برس ////
بعد مواجهات كانت متوقعة الى حد ما بين مهاجرين من جنوب الصحراء وبيضاوة البارح بدرب الكبير فكازا عاد الهدوء هاد الصباح للحي. هدوء موحالش غادي يطوال. لمغاربة ما باغينش هاد المهاجرين وكيقلبو على امور تافهة باش يتخلصو منهم. هادي نتيجة سياسة اتخذت من الفوق بلا ما يوجدو المجتمع بلا ما تكون جمعيات تشرح للمغاربة اش نا هو التصرف العنصري واش نا هو اللي ما شي هو.
التعليقات وحتى الكتابات اللي راجت البارح من فئات وشرائح اجتماعية مختلفة فيها عنصرية كبيرة. كاينة مشكلة للمهاجرين خاص مدينة الدار البيضاء تحلها وخاص السلطات المكلفة بالملف اللي لحد الان غير الداخلية تلقى حلول ليها. الشغل السكن وكل الامور اللي تحفظ كرامة وانسانية المهاجرين. دابا بصور البارح اللي حرثو الجمل دكو. رجعنا بلد ضد الافارقة وحنا بانيين خطاب سياسي ديبلوماسي فيه انفتاح على القارة واستقبال المهاجرين.
العنصرية غادية وتفشى خاصة فالفئات اللي عندها احتكاك يومي مع المهاجرين غير القانونيين خاصة. عنصرية تمتد وتكبر.
شي نهار نوصلو لمواجهات طيح فيها روح وتولي مشكلة امنية وحقوقية وانسانية كبيرة. البوليس يقدر يدير خدمتو ويدخل ويوقف عنف ليلة ولكن ما عندو ما يدير ايلى ولات ظاهرة مجتمعية. كلشي خاصو يساهم فيها.