كيفاش غادي ينتفكم منصف صنيعة الماجيدي يا خوتي البيضاوا: كيفما دار فالوزارة باغي يدير فكازا وغادي يرجعها وزيعة للعائلة لشركاتو وغادي يعطيكم كازا سبور تكميوه فابور

ما عمرني شفت صنطيحة وجبهة بحال ديال منصف بلخياط. كلشي عندو مصطنع. كيمارس السياسة بحال شي دري صغير كيلعب. غير هاد الدري عارف غادي يربح العاب كثيرة فهاد اللعبة الانتخابية. الوزير اللي دخلو سيدو وولي نعمتو منير الماجيدي مدير الكتابة الخاصة للسياسة ولبسو التوني الازرق باش يسير الرياضة والشبيبة ويفوت اراضي تابعة للوزارة لمرجان اللي كيسيرو سيدو منير، ارتبط عهدو بالفضايح. كراء اودي ب9 المليون غير اللي بان. كاع المارشيات اللي كانت كدوز فالوزارة من "صفقة ديل" اللي فضحاتهم "كود" حينها الى مهندسة ملاعب القرب والتواصل ووو كلهم للعائلة وللاقرباء.
علاش هاد التاجر الشاطر عجباتو السياسة، لانه باش خرج من الوزارة شرى فيلا ب3 مليار وتجارتو ضاعفات ومعارفو كثرو، فهم باللي السياسة فيها لفلوس بزاف بزاف.
دابا هاد السيد اللي مرشح بسيدي بليوط بالدار البيضاء قدم البارح ندوة صحافية. قدم مجموعة من الوعود فيها الارقام، نشوفوها اولا: "مهرجان الدار البيضاء للتسوق" و"فتح 25 ورشا لبناء الفنادق" و"مهرجان دولي كبير" و"تثبيت الف كاميرا" و"تأسيس شرطة القرب" و"خلق نظام مائة اسعافي" و"خلق بوابة الكترونية" وخدمات الويفي و"تحويل مركب محمد الخامس الى فضاء اخضر" بالاضافة الى قصة الالعاب الاولمبية.
السيد فدماغو غير البيزنس وخوتو البيضاوة سوق كبير باغي يزيد يمصهم كثر مما هم ممصوصين. هاد التاجر انتبه الى ان البيضاء سوق واعدة وباللي هاد المشاريع محتاجة شركات وايلى وصل وهاد الشي ما بغيناهش لمدينة دوزات كل اشكال الفساد طيلة تاريخها غادي يكون شركات كثار. خوكم منصف غادي يوزع الصفقات على خوتو اولا وثروتو غادية ضاعف.
لذا اخوتي البيضاوا منصف غادي يكميكم كازا سبور حقاش عندو شركة لتوزيع الكارو وهو غادي يكمي السيكار. شوفو تجربتو فالوزارة مزيان وحكمو. شوفو العرس اللي دارو لخوه وحطاتو العائلة فالفايس كانجازات ال منصف وحكمو. واش بان ليكم اخوتي البيضاوا شي واحد من الشعب عندو؟ غير باش تفهمو باللي هاد الكائن منين جا واش باغي