أوبر غير تمشي تقود مافايدانا بوالو، لي مهم هو قطاع النقل العمومي يتصلح فهاد البلاد ، أما ذهاب أوبر أو بقائها راه زايد ناقص

حلم بزاف ديال المواطنين هو كريمة ديال طاكسي يعيشو بيها، هاد الكريمة لي كتخوليك تدخل مقدار محدد كل شهر مدى الحياة، بالإظافة الى الحلاوة ديالها وداكشي ، المهم لي عندو كريمة راه عمرو يشوف الفقر لي عندو جو جراه لاباس عليه، هاد الكريمة كيعيشو بيها بزاف ديال الناس حتى كتوصل الطوموبيل للشيفور هو اللخر خاصو يحط الروسيطة يوميا ويشيط ليه باش يعيش ، الشيفور بلا تغطية صحية بلا وراق بلا أيتها لعبة ، والى دار شي حاجة يمشي ليه البيرمي بينمات الكريمة كتبقى بلاصتها مكتحركش، وهادشي لي كيخلي بزاف ديال الشيافر يدورو جاعرين فالمدينة بحال قطاع الطرق ، لي قدامهم يكحشوها وخاصهم يجيبو الروسيطة ويشيطو نهارهم بأي طريقة ، وهادا هو الجحيم لي كيعيشوه المواطنين يوميا .
ملي بانت أوبر بزاف ديال المغاربة مشاو ليها ، والصراحة كانت بديل زوين للطاكسي ، حديد نقي شيفورات نقيين مكاين قوة الهدرة ويمكن تديرليهم تقييم ، والى تعاملو معاك خايب تشكي بيهم ، كيهزوك منين بغيتي ويحطوك فين بغيتي فالمقابل الثمن زايد شوية ولكن يستاهل، غير هو الموشكيل أوبر شركة لي معروفة فالعالم بالعديد من الفضائح ومنها التهرب الضريبي وشلا مشاكل خرى ، وبحال بحال أي شركة عالمية خرى راه كتدخل تنيك البلاد وتمشي مقابل خدمات لي حقا محتاجينها المغاربة، ولكن حنا كمغاربة أحرار كنفضلو أننا نيكو بعضياتنا على أن ينيكنا البراني ، حقا راه حتى الطاكسيات مكتربح منهم خزينة الدولة والو بحكم أنه قطاع ريعي ، ولكن راه عايشين من ورا هاد القطاع الألاف من الأسر المغربية ، مدورين السمطة بهادوك الكريمات ، والى مشا حتى تضرر هاد القطاع راه أسر كثيرة غادا تجي فيها .
أوبر غير تمشي تقود مافايدانا بوالو، لي مهم هو قطاع النقل العمومي يتصلح فهاد البلاد ، أما ذهاب أوبر أو بقائها راه زايد ناقص ، والقالب لي تعرفو حسن من القالب لي متعرفوش، غير هو ذهابها خاص يخلي موالين الوقت يضربو الفگد فهاد القطاع ويصلحوه الى باقي فيه شي مايتصلح، حيث فالأخير المواطن لي لي مهلوك وهو لي مكيلقاش فين يركب وهو لي كيوصل لخدمتو بحال الى عاد خارج من الحرب ، وهو لي كيدير مناقص من الفر غر على ود المركوب مكرفص وغالي .