اللي خص الدولة تحاربو هو إرهاب الشارع لي كتعرض ليه كل مرأة أو مثلي أو واحد من الأقليات المختلفة كل نهار ماشي شباب دارو تظاهرة سلمية

—
جوج اعتدائات على مواطنات مغربيات فهاد الشهر الكريم بسبب ملابسهم "الغير محتشمة" لي تشهرات وتداولتها المواقع الإجتماعية ، وحدة فمارتيل ووحدة فكازا فعين الذياب ، حادثة مارتيل خرج بيان من ولاية أمن تطوان كيدوي على أن الأمر مجرد خلاف بين بياع وشراي وأم الفتاة ، وماشي هجمة جماعية لتغيير المنكر ، هادو فقط جوج حوادث لي قدرنا نعرفوهم اعلاميا ولكن راه بزاف ديال المضايقات لي كتعرض ليهم المرأة المغربية فهاد الشهر، كاع مكيوصلوا للإعلام ، وديما بدعوى احترام حرمة هاد الشهر .
الجيل التاني ديال المهاجرين من القرى للمدينة ولي تزاد فالمدينة ولكن فأحياء هامشية ، ماقدر يحافظ على الطابع البدوي ديال الحشمة والوقار والنخوة ماقدر يتمدن وياخد ثقافة الحواضر ، والنتيجة هي جيل ديال بوزبال جاعر بدون قيم أو أخلاق وبدون سلوكات متمدنة لدرجة بزاف ديال المدن تم بدونتها ، وولات فيها اخلاق هجينة بلا اصل مبنية على التعدو والحكرة والتدخل فالآخر ، ومن غير رمضان كاين هادشي ، ولكنه كيتركز فرمضان لأنه بحال الى كيعطي شرعية دينية للمعتدي والمتحرش ، كيولي كيمارس الكلاخ ديالو بغطاء ديني ، لي يقدر يوصل فعدة حالات الى اعتداء جسدي ، مادام الدولة براسها كتعاقب مفطر رمضان جهرا ، فراه كيحس براسو بحال الى واقفة معاه الدولة فهادشي .
حالات الإعتداء على المفطرين فرمضان أو البنات لي واخدات راحتهم فحوايجهم، مؤخرا ولات كتوثق بالفيديو ومع ذلك قليل فين كنشوفوا عقوبات صارمة اتجاه المعتدين ، بينما يعاقب شباب آخرون بالحبس على ود شاركوا فإحتجاج سلمي من أجل مطالب مشروعة ، كاين ألاف آخرين يفسدون فالأرض ويعتدون يوميا على مواطنين حيث ماجاوهمش على كانتهم أو مختالفين عليهم ، راه هذا هو الإرهاب لي خاص تحاربو الدولة هو ملي ينوضوا جماعة يعتديو على بنت حيث لابسة صاية فنهار ديال رمضان .
قضاء الشارع أكثر حاجة ولات كتخلع فالشارع المغربي ، والإعتدائات على الاقليات أو على المرأة عموما ولات شيئ متداول وديما حاضر كخبر ، والعديد من مثل هاد الممارسات مكيتوثقش أو مكياخدش صدى فالمواقع الإجتماعية ، وحتى ملي فالحالات الشهيرة لي تشدو فيها المعتدين العقوبات كانت مخففة ، بينمات الأولى هو تشدد العقوبات فهاد المجال ، راها مسألة هيبة دولة كتمشي ملي كيولي بنادم كيدير شرع يديه ، ويولي المواطن فاقد الثقة فالأمن بأنه ياخدليه حقو من مثل هاد الأوباش ، راه هذا هو الإرهاب الحقيقي إرهاب الشارع لي كتعرض ليه كل مرأة أو مثلي أو واحد من الأقليات المختلفة كل نهار .