دابا نايض جدل كبير كيقول اش كانت عناصر الفرقة الوطنية من 3 سيارات رباعية الدفع كدير فشاطئ بين بوزنيقة والمحمدية وبالضبط فالمنصورية باش شدو الشيخ الجليل عمر بنحماد والفقيهة التقية الورعة فاطمة النجار؟ شهادة بنحماد امام اعضاء الاصلاح والتوحيد كال باللي وقفو عليهم 3 سيارات رباعية الدفع. الشي لاخر نرجعو ليه من بعد. ناس الاصلاح والتوحيد كالو باللي هادي مؤامرة والفرقة الوطنية للشرطة القضائية اش كانت كدير تماك وهي بلاصة الدرك. كلامهم معقول جدا غير حسب معطيات حصلت عليها "كود" وتؤيدها المعطيات التي نشرت استنادا الى مقرب جدا من بنحماد فان اعضاء الفرقة ما كانش باغية اصلا تزيد معاه فالهدرة. لقاو راجل ومرا فكاط كاط كالو ليهم هاد الشي عليكم خطر اش كديرو هنا. بمعنى كانت القصة تسالي بلا صداع لو ان بنحماد تصرف بهدوء. حقاش كال ليهم مراتي وباش سولوه على العقد كال ليهم زواج عرفي هنا باش دار الشبهات. مصدر "كود" اكد ان لا احد من اعضاء الفرقة عندو شي علم بهاد الشخص ولا مكانتو ولا شكون هو. الفرقة الوطنية حسب مصدر "كود" كانت تترصد احد كبار بارونات المخدرات صباح يومه السبت واكد مصدر "كود" ان النيابة العامة كانت على علم بتحركاتها. اي ان البوليس ما كانش سوقو اصلا فهاد الشي. اييه بلاصة الدرك ولكن الشرطة كانت عندها مامورية اخرى وهي البارون اللي بغاو يشدوه فحالة تلبس. الكارثة وفق مصادر "كود" ان هاد البارون تحرك من هاديك لبلاصة كاع. هاد الشي كيتسمي فالقانون٬ يقول مصدر "كود" ب"حجز عرضي" كتكون خدام على ملف وكتلقى عمل عرضي تقوم به. ومن بعد طبعا تم التسليم للدرك اللي قام بعملو. دابا صحاب الاصلاح والتوحيد يسولو وزير العدل ولا رئيس الحكومة راه يقدر عندو معطيات اكثر دقة وغادية تصدم كثير منهم تفاصيل اخرى توافيكم بها "كود" لاحقا عن ملف مثير
