عزيز اخنوش رئيس التجمع الوطني للاحرار هو اللي كبر الشان لهاد الحزب ديال الاتحاد الدستوري. حزب العود بحالو بحال احزاب اخرى صغيرة كانت غادية وتراجع للاور حتى يبقى عندهم فالبرلمان جوج او 3 ويمكن شي نهار يختافي كيف ما بان مع وزير الداخلية ادريس البصري ف1983. اخنوش دخلو للحكومة وعطاه جوج حقائب وزارية ووزراؤو بينو على ضعفهم. محمد ساجيد فالسياحة ضعيف وعيان وولد فردوس كلشي كيقلب عليه الا اللي كيفطر ف”فوشون” فكازا مرة مرة كيبان مع عائلتو نهار الاحد. هاد الحزب اللي ما صالح لوالو دار اجتماع البارح كاليك بمقر الأمانة العامة فكازا. الاجتماع كان٬ وكان هو موضوعنا٬ “للجنة المكلفة بصياغة المشروع التنموي الجديد للمملكة من منظور حزب الإتحاد الدستوري وذلك تكملة لمسار الاجتماعات المتتالية التي تعقدها اللجنة” شوفو الصور غير انتوما. شوفو هاديك اللي دخلات البرلمان فاللائحة الوطنية ودارت الشعر فبنكيران حتى هي حاضرة. هاد لوجوه. حققو فيهم مزيان٬ واش قادرين يقدمو مشروع تنموي للمغرب. هما ركبو على الخطاب الملكي اللي طلب من الجميع يوجد هاد المشروع التنموي وناضو حتى هما بلا حيا بلا حشمة كيهدرو. هاد اللجنة من الاسماء اللي فيها من الوجوه من الاشكال كيتبين اللي ما يمكنش ينتجو افكار ما يقدرو والو. اللي خاصو يوقع هو اخنوش يفك هاداك التحالف معاهم وكل واحد يشد طريق هادو غير من الصورة يبان ليك اش باغيين. خاصهم شي مانطات ينعسو ويرتاحو ماشي مكاتب يفكرو ويقتارحو
