غير على هادي خاص الفعفاع يتحاكم على فضايحو فتعيين السفرا واياكم تخليوه فهاد المنصب. شوفو شكون رسل سفير لايرلندا بعد فضايح تعيينات كثيرة منها استراليا بلا ما نهدرو على افريقيا والمغرب يربح الصحرا ايلى بحال هادو ما ياخدوش المناصب

الفعفاع اللي كيحمل اسم صلاح الدين مزوار اللي وزير الخارجية والتعاون وخربها على هاد الوزارة بتعيينات كارثية خاصو يتحاكم عليها. دابا يبدا يبان العيب من افريقيا وما فوق. مزوار اللي كيكول لكلشي صحابو فالخارجية راه باق ويتمدد فالخارجية غادي يولي سبة فحكومة بنكيران وسبة لاصقة فعزيز اخنوش رئيس التجمع الوطني للاحرار ايلى خلاه فهاد المنصب. كبير عليه بزاف واساء ليه بزاف فتعيينات السفراء. عين احد اضعف اطر الخارجية المدعو كريم مدرك اللي كان جابو بوريطة وكيعبدو وعطاه التواصل٬ عينو فاستراليا. دابا بيني وبينكم التاريخ غادي يبان ليكم ان هاد السيد ما غادي يدير والو حقاش ما فيدوش. كان كيكذب على بنادم ويقول ليهم قاري ففرنسا حقاش عندو عقدة من هاد الناحية والسيد ما عمرو حط رجلو فيها.
ماشي غير هادا اللي شوهة. كيبان لي اكثر فضيحة هو تعيين هاداك المدعو لحسن مهراوي سفير للمغرب في ايرلندا. ماشي غير سفير بل سفير مفوض فوق العادة. السيد عطى البارح الثلاثاء اوراق اعتمادو اثناء استقباله من قبل الرئيس الإيرلاندي مايكل دي هيغينز.
هادا واحد خينا كانت تعرض عليه جمعيات الهضاب والسهول والوديان الخاوية الفاشلة لندوات وتقدمو على انه صحراوي وهو ابن كلميم ما معنيش كاع بالمناطق اللي فيها نزاع.
خدم مع بزاف حتى وصل وولى سفير. ما فيدوش يا عباد الله واللي دارو ساء للمغرب وساء لقضيتو. واش منصب سفير مبني على الولاء لاشخاص ولا حب الوطن. كاينين صحراويين كينتقادو بشدة المغرب حقاش معاه ماشي ضدو هادو يستحقو. موجودين فالعيون فبوجدور فالسمارة فالداخلة. ماشي خاصهم يكونو فالرباط باش يشوفوهم امثال الفعفاع ماشي خاصهم يكون راضي عليهم هاداك المسؤول او ذاك ماشي خاصهم يكونو كاريين حنكهم لهادا او داك.
الصحراء غادية تحل نهار ما يبقاش بلاصة فيها لامثال هاد السفير. نهار اللي يقبلو صراحة وقوة شخصية بحال ولد سويلم اللي كان سفير فمدريد وطرد شي وحدين كيكولو راه صاحبهم هاداك المسؤول الكبير فالمخابرات الخارجية ولا راه من طرف هاداك الشخص القوي الاخر. المغرب غادي يحل مشكلتو نهار ما يبقاش يخاف من شخصية واحد بحال عمر العظمي. اييه متهم بملفات حقوقية بحالو بحال كاع قادة البوليساريو بما فيهم ابراهيم غالي ولكن كيحاربوه باش رجع للمغرب حقاش ما كيديها فحد. ضارب مع المافيات وعوض يعطيوه الحق طيروه من ولاية كلميم.
الصحراء تحل قضيتها نهائيا باش ما تبقاش بقرة حلوب يجيو صحاب الرباط ويديرو مهرجانات وغير مهرجانات بحال كرانس مونتانا ويديو لفلوس. علاه ما كاينينش ولاد المنطقة وبناتها اللي ما مع حد اللي ما يعقلو على حد وعزيز عليهم المغرب مغرب الحق والقانون. الصحرا غادية تخل قضيتها نهائيا باش ما يبقاش تعيين وزراء تتحكم فيه تقارير على شخصيات حقاش ما بغاتش تمشي مع هاد الطرف ضد طرف كيف ما دارو مع ولد الرشيد فحكومة بنكيران الاولى ومع كجمولة بنت ابي. دخلات التماسيح والعفاريت اللي من مصلحتها يبقى النزاع ولخواض واللا حل ووقفو ضد استوزارهم.
شفتو ساهلة المغرب يربح القضية غير هادوك المغتنين بالقضية واللي الدولة عارفاهم حقاش فسنوات قليلة دارو ثروة كبيرة وما عمرهم دارو التجارة ولا البيزنس. بغيو المغرب ما تبغيوش مصالحكم يا الملهوفين