واناري علي بنعرفة وشوهاتو. كيدير الاشهار لمدرسة مولاها مبحوث من الانتربول. لفضيحة لخرا ان اخت رئيس الحكومة خدامة مديرة تربوية فمدرسة هاد خينا

بلا حشمة بلا حيا ترأس اليوم سعد الدين العثماني رئيس الحكومة واحد الحفل فمدرسة ديال احمد الفهدي، واللي هو رجل أعمال كيقلب عليه الأنتربول على ود اتهامات وجهاتها ليه السلطات الفيتنامية٬ كيفما هو كاين فالاتهام سرقة 150 مليون دولار من بنكة ديال هاد الدولة الفقيرة.
هاد الحفل تنظم فمدرسة الفهدي بلا خبار المؤسسات التعليمية المشاركة، حسب ما أكده ل”كود” عدد من مسؤولي المدارس المشاركة، واللي كترفض يتم ذكر اسم مؤسساتها التعليمية مع هاد المدرسة ديال الفهدي، اللي كتشتاغل فيها٬ وفق مصدر “كود”٬ أخت سعد الدين العثماني كمديرة تربوية.
المسابقة كان من المفروض تنظم فمدرسة جورج واشنطن الأمريكية، لكن بقدرة قادر انتاقلات المسابقة لمقر بريتيش سكول، اللي هي مدرسة الفهدي اللي خلاتو كوكوس خوفا على مسارها السياسي، والعثماني جا كيجري عندو باش ختو تبان على الفهدي.
اش هادشي دابا… واش ماشي حشومة رئيس حكومة ينوض يقوم بزيارة لمؤسسة في ملكية شخص دايرين عليه الفيتنام والأنتربول مذكرة بحث دولية وبالشارة الحمراء.
واش هاد العثماني ما كيقدرش حجم الكارثة اللي دار ملي مشا لمؤسسة فملكية واحد روشيرشي