المسؤول على البرمجة العربية في مهرجان “موازين” محمود لمسفر خاصو يمشي فحالو ولا طردو “مغرب الثقافات” ماشي على فضايح الدورات السابقة بل على فضيحة هاد العام. الفنانة السورية اصالة دارت تدوينة كتقول باللي طلبو منها رشوة باش تشارك فمهرجان “موازين” هادي شي اسبوع. ادارة “موازين” ما رداتش. اليوم خرج لمسفر محمود مدير البرمجة العربية ببيان غبي باش يقول ان اصالة ما كانش مبرمجة “لم تتم برمجة الفنانة أصالة في مهرجان موازين إيقاعات العالم منذ سنة 2015 بما في ذلك دورة2018، ولم يكن هناك أي اتصال على الإطلاق معها بشأن مشاركتها خلال دورة هذه السنة” واضاف “لا علم لي بها على الإطلاق إلا من خلال التدوينة التي نشرتها”. علاش تصريح غبي. اولا تعطل بزاف بزاف. ثانيا وقعو كمدير عام “لوكالة متخصصة في تنظيم الحفلات لنجوم الفن العربي” عاد اضاف ليه ؛التنسيق الفني” وسالى ب”مستشار فني مكلف بالبرمجة العربية لعدد من المهرجانات من بينها مهرجان موازين إيقاعات العالم عبر عقد لكل دورة”. يعني باش يبين راسو واعر. هاد النكرة اللي ما كان كيعرفو حد اعتابر خدمتو ف”موازين” وغير عقد كل دورة “اخر حاجة كتهمو”. فضيحة رشوة بحال هادي كتمس مهرجان بحال موازين” كان خاصو اولا يزرب ويرد وثانيا يقاضي اصالة ويطلب منها كاع التفاصيل على القضية ديال الابتزاز. كيفاش ما هدرتش عليها كاع. ما طلبتش منها تعطيه شكون هاد الواسطة. ثم هاد المهام اللي عندو ضرات موازين وخدمات البيزنس ديالو. كان كيجيب فنانة فدورات سابقة يخدمو فموازين ويبرمجهم ببلايص اخرى فالمغرب. خدام كيستافد من المهرجان وصافي قبل ما يجريو عليه خاص يتفتح تحقيق داخلي على كل ما قدمو فالدورات السابقة. كان كان الشي مزيان يديرو ليه تكريم ولا كان شي تخلويض يتحاسب عليه
