علاش كلشي ضد الستاتي بعد ورشة فالثقافة والفن مع شبيبة الاحرار. واش المشكل فيه ولا فالحزب. راه اسطورة حية ولا ما فهمتش هو فالفن حتى حد ما غادي يفهمو والغبي هو اللي كيقلب على مواقفو السياسية

عبد العزيز الستاتي اسطورة حية فالفن المغربي علم من اعلام الثقافة المغربية. ماشي هاديك الثقافة العالمة ديال هادوك اللي كيشوفو المغرب من الفوق وكيحددو ليهم الذوق بل الثقافة المغربية ما كيعجبنيش حتى عبارة “الشعبية”. هاد الاسطورة كلشي يحلم يسمع ليه يستضافو يتكلم معاه. الستاتي هو الفنان الوحيد فالمغرب اللي فين ما حضر لشي مهرجان كيف ما كان هاد المهرجان كيحطم الرقم القياسي فالجمهور. جاو كبار الفنانين العالميين لموازين وما قدر حتى حد يفوتو فالمتابعة الجماهيرية بل حتى فنسبة المشاهدة فالتلفزيون فهاد المهرجانات كترتافع مع الستاتي. علاش؟ حقاش فنان حقيقي بكل ما في الكلمة من معنى.
قودها فهاديك الاغبية ديال “سيدنا” اييه حقاش بدل الاسلوب ديالو ماشي على الكلمات ابدا بل على الايقاعات. الستاتي هاد ليام كيتعرض لهجوم فيه كثير من العنصرية٬ على مشاركتو فتأطير ورشة للثقافة والفن مع شبيبة الاحرار فالقنيطرة. كان فالورشة الزيتوني عبد الرزاق مسرحي ممثل اللي هو مدير لجنة الفيلم بورزازات. حتى حد ما هدر على الزيتوني وكلشي تكلم على الستاتي. تكلمو عليه بعنصرية كيف قلت ماشي عنصرية عرقية ولكن ثقافية. انت مول الجرة اش دا بوك تهدر على الثقافة. هاد العنصرية عانتها اشكال فنية مغربية لسنوات وسنوات وقلنا يمكن هاد الشي ما بقاش. اليوم نكتشفو انه رجع وبشكل اكثر حدة.
ايلى ما حضرش الستاتي لهاد الورشة قولو لي شكون يحضر ليها فهاد البلاد. واش كاين شي اسطورة حية بحالو. باش حزب يعرض عليه المهم التجربة الحياتية وديال الستاتي كبيرة بزاف بزاف. هاد السيد ما خداش حقو فالمغرب. مهمش حقاش كاينة عقلية كتسوق الثقافة العالمة. باغيين يحصرو المغرب فشكل معين. بحال هادوك فالتلفزيون اللي كيعبرو على الفرحة غير بالطرب الاندلسي بحال ايلى دارو الشيخات والفيجطة غاديين يحطو من قيمتهم وحنا عارفين باللي الفرح عندها مرتبطة بالعيطة بالجرة.
المشكلة يمكن كاينة فحزب الاحرار. كون جاب شي حد اخر غاديين يقولو عليه وشفتو هاد الشبيبة ديال لمرفحين ما كتعتارفش بما هو اصيل فالمغرب وباش جابو اسطورة هاد الفن فالمغرب قالو اللا ما كيفهمش فالسياسة. المشكلة ماشي فيه فهادوك اللي كيلوحوه فالسياسة. ما محتاجش منو يكون سياسي هو راه فنان وسالينا. هاديك السياسة خليوها عندكم وكولوها. فهمو للواقع اعمق منكم انتوما يا مثقفين يا اقصائيين لكل ما هو غير عالم حسب فهمكم. دليل هاد الشي شعبيتو.