بعد الفيديو الاهانة لريافة. كاليك شي رباعة ديال الفنانين غاديين بيهم الحسيمة غدا. احسن استقبال لهاد لكمامر هو البيض الخامج ليهم وللمنظمين

المكتب الوطني للسياحة ديال ازويتن مول فضايح مهرجان فاس وفضيحة الطيارة اللي كراها لراسو وعائلتو تديه لروما باغي يدير فكرة غادية تزيد تحتاقر ريافة عموما وسكان الحسيمة على وجه الخصوص. هاد السيد كاليك قرر يجمع رباعة ديال الفنانين واشبه الفنانين واللي تكلف شي واحد كان فاستوديو دوزيم وكيدعي بحال كثار باللي واصل للفوق. تفو عليه وعلى اللي بحالك.
الرحلة غادية تكون غدا مع التسعود وعطاو المارشي لشي صديقة ديالهم. ياك كالو ريافة راهم عصابة. شي فشي وديالنا فديالنا. هاد الفنانين واشباه الفنانين باغيين يديوهم للحسيمة باش يديرو. بغاو يكولو زعما اه الحسيمة هانية. فالحقيقة باغيين يضحكو على ناس الحسيمة. باغيين يزيدو يدلوهم بعد الفيديو الفضيحة ديال البارح اللي بين قائد الحراك عريان وهان كاع الاحرار فالبلاد كيف قال والدو فتصريح ل"كود".
احسن استقبال من ناس الحسيمة لهاد خياتنا اللي غاديين بفلوس الدولة بميزانية الدولة باش يتساراو فهاد الوقت الحساس هو الاستقبال بالبيض الخامج كيف معمول به فالدول الغربية لضيوف من عينتهم. هذا غادي يكون احسن استقبال باش ما يبقاش شي مسؤول يدير تصرف فيه هاد القدر من الغباء. حقاش ما عمر شي فنان من هاد اشباه الفنانين حل فمو ولا هدر على الحراك. هادو فاتو بزاف الاحزاب المشكلة للتحالف الحكومي اللي اتهمات سكان الريف بالانفصال حقاش سكتو على ما يقع ووقع هناك. دابا ما عندهم ما يديرو تماك