عنداكم تعاودو تجربة ولد زورال مع البي جي دي راكم غاديين تعطيوه ولاية ثالثة وبلا حملة انتخابية. الحزب صورتو تهزات مع بنعرفة ولكن الجمع بينو وبين بنكيران تخربيقة وسيروم جديد للمصباح باش يبقى شاعل

دابا فهاد الوقت كلشي كيبين باللي حزب العدالة والتنمية اللي كيقود الحكومة ضعيف. حزب اتبث فشلو ماشي غير فتدبير المرحلة بل خلى الناس اللي صوتات عليه مقلقة بزاف. من النهار الاول كنا كنگولو ف »كود » راه خرجات هاد الحكومة من الخيمة مايلة. راه غادية للحيط حقاش اللي جابوه لرئاستها كان بالفعل بنعرفة. استعمل باش يضرب بنكيران اللي كان فالحكومة وربح جوج انتخابات تشريعية وبلدية جهوية ف2015 و1016.
دابا هادي حكومة العثماني او بنعرفة او اللي دار هاد المخطط. اييه الحزب اللي يتحاسب هو حزب العدالة والتنمية لانو يقودها. لكن الربط بين بنعرفة وبين بنكيران غادي يعطي نتائج عكسية. عقلو هانا قلتها ليكم. اي واحد مشى كيجمع بين واحد جاب الانتخابات على يدو وجا فظروف « ديموقراطية » حقاش عندو شرعية الصناديق او الشرعية الشعبية وقاد الحكومة الاولى وكلم خمس سنين وبين اخر جابوه وعطاوه يشكل حكومة بعد كاع هاديك المعيقات اللي دارت باش يطير بنكيران٬ راه كيساهم بشكل او باخر فدعم البي جي دي وفتقويتو وفاعطاؤو فرصة يوظف المظلومية ويرجع قوي.
بنكيران بنكيران وبنعرفة بنعرفة. تختالف مع التقييم ديالهم ولكن واحد رجل دولة والثاني رجل جماعتو وحزبو. الاول كان فوق الحزب والثاني كيتحرك غير باش يدعم الحزب. الاول كانت عندو الجرأة يفضح وهو فمنصب المسؤولية ويدافع على قرارات واخا تخاذ بعضها بلا ما يعلموه فالاول والثاني تالف دايخ بلا شخصية. ولى ضحكة.
دابا مع المعارضة الضعيفة والمشتثة. البام مضارب بيناتو والاستقلال عندو امين عام ماشي ديال المرحلة ومع الاغلبية اللي كلها صراع واللي جهات فالدولة عطات ضربة خايبة لبعض مكوناتها كيف ما دارو مع عزيز اخنوش رئيس التجمع الوطني للاحرار فملف المقاطعة٬ كاين غير البي جي دي اللي غادي يستافد من الوضع. ما ضربوش البي جي دي بالجمع بين واحد كان عريس وختار العرس ديالو وبين واحد جابوه قبل الزواج ودخلوه. هاد الشي غادي يقوي الحزب.
الحزب دابا ناسو كيحسو بالشمتة ولكن ايلى بدا التوجه ديال تجمعهم كلهم فسلة وحدة وانت ما عندكش بدائل كثيرة راه كتعطيو ولاية جديدة للحزب فالانتخابات التشريعية المقبلة