هذا هو برنامج الوفد البلجيكي الضخم ف المغرب و الرباح دار خطأ بروتوكولي مع الأميرة البلجيكية

هاد الايامات كترأس الاميرة البلجيكية أستريد وفد بلجيكي ضخم فيه قرابة 469 شخص لزيارة المغرب ف مهمة اقتصادية و ديبلوماسية، وهاد الوفد هو اضخم وفد دارتو بلجيكا ف تاريخها لزيارة شي بلد حسب الصحافة البلجيكية.
الوفد فيه اقتصاديين و مقاولين و سياسيين و مثقفين ومنهم اللي اصلو مغربي وكلشي غادي باش يشوف الفرص الاستثمارية اللي كاينة ف المغرب و اللي محتكرها فرنسا و حيث الاقتصاد المغربي مستقر وواعد وغادي فطريق مزيانة حسب محللين اقتصاديين بلجيكيين علقو هاد الزيارة ف القنوات البلجيكية.
الوفد فيه وزير الخارجية البلجيكي ريندرس و كاتب الدولة ف التجارة الخارجية ديكريم ووزير الاقتصاد الوالوني بيير جيهولي و غيرهم من المسؤوليين الكبار و المئات من رجال و نساء الاعمال..
بعد الوصول مساء امس الاحد اليوم بداو اليوم افتتاح المنتدى المغربي البلجيكي فمقر الشركة المغربية الجوية و الفضائية و اللي كان فاستقبالهم الوزير الرباح اللي يمكن ماعارفش البروتوكول الاميري البلجيكي حيث سلم علي الاميرة بطريقة عادية وكان عليه يعرف ان” استريد ” هي من القليلات ف الاسرة المالكة البلجيكية اللي عندها لقب ” برانسيس دو بلجيك” حيث هي اخت الملك، و بالتالي كان عليه يجر يدها برفق حتى لعند الفم ديالو و يردها وصافي وماشي يبوس اليد ولا يسلم بطريقة عادية كما دار.
يوم الثلاثاء الاميرة و معها الوفد غادي يشوفو العثماني و بوريطة وغادي يتم تدشين مقر جديد للسفارة البلجيكية ف الرباط.
اما نهار الاربعاء الوفد غادي يمشي للدار البيضاء باش يتوقعو و يتعلنو اتفاقيات شراكة بين البلدين و غادي تكمل الزيارة نهار الخميس ف طنجة.
للاشارة الزيارة السابقة اللي كانت بحال هكا كان دارهها الملك فيليب عام 2009 وكان ديك الساعة مزال ولي عهد.