غير الملك راجع وكلشي اللي معني بالحكومة ناض كيهدر. بعد الاتحادين اللي غير زايدين والحركة: آلبي بي اس: الرجوع لله والاحرار غادي يخرج بيان هاد العشية

دابا شوفو شحال وحنا كنتسناو حكومة وكلشي كان ضارب الطم ومخليين بنكيران عبد الاله المكلف بتشكيل الحكومة معلق، غير سالى الملك زيارتو اللي طول فيها بزاف فإفريقيا وشي جن امر شي احزاب اللي ما هي احزاب تخرج.
هاد الشي كلو باش يتفهم فسياقو، جا بعد ما قال بنكيران انه يتسنى عودة الملك للبلاد باش يخبرو فين وصلات المفاوضات واش وقع. هاد العاليم اللي كيوحي للأحزاب طلع مرة اخرى بليد.
واش كاين شي عاقل عزيز عليه بلادو وباغي تطور ديموقراطيا غادي يصدق بيان الاتحادين اللي كيتشابهو: ندوة ادريسً لشكر الاتحاد الاشتراكي وبيان الاتحاد الدستوري. وزيد عليهم خرجة محاند العنصر ديال الحركة الشعبية اللي وصل لرئاسة جهة فاس مكناس بولمان بدعم العدالة والتنمية اللي كيدور فيها.
بعد هاد الشي خرج التقدم والاشتراكية وقال الرجوع لله واش بهاد الشي تحل الأمور، بردو بردو. فهاد الوقت التجمع الوطني الاحرار داير اجتماع مكتبو السياسي وغادي يدير بيان. حسب مصادر "كود" غادي يعاود يؤكد على تحالفو مع الاتحادين وانو ما كاينة حكومة بلا هادو.
وبالتزامن يعقد العدالة والتنمية اجتماع امانته العامة، حتى هو غادي يؤكد على حكومة بالاغلبية السابقة، يعني يستحيل يدخل ليها لشكر.