الانتخابات البلدية ف بلجيكا بالتفاصيل: هدو هما المغاربة اللي غادي يكونو رؤساء والشيخ “مورو” رجع لمولنبيك

كملات البارح الانتخابات البلدية ف بلجيكا و اللي شارك فيها بزاف من المغاربة كمرشحين من مختلف الاحزاب. التصويت ف بلجيكا اجباري و اللي ما مشاش يصوت غادي تستدعيه المحكمة و قدام القاضي الا ماعطاش تبرير معقول على سبب الغياب ديالو يقدر يخلص غرامة مابين 250 يورو تال 500 يورو..وحتى رؤساء و اعضاء المكاتب د التصويت كايتختارو عشوائيا ضمن لائحة المصوتين و خصهم يحضرو ضروري نهار كامل يتسقبلو المصوتين و ينظمو عملية التصويت و احتساب الاصوات وكلشي بلا تعويض ولا اي شيء ماشي بحال المغرب ، حيث هادشي كلو كايتعتبر واجب واطني.
الاجانب اللي ساكنين اكثر من 5 سنوات عندهم الحق يصوتو تاهما و حتى يترشحو الا بغاو . و يمكن لاي واحد ،من خارج الاحزاب، يدير لائحة ديالو و يسميها كما بغا و يتقدم للانتخابات و هادشي علاش كانت لوائح غريبة بحال لائحة القراصنة، و لائحة البوكيمون و غيرهم..
العمدة ف بلجيكا كايتسمى” بوركميستر “وكتكون الكلمة من جوج كلمات: بورك او بورج اللي كتعني المدينة ومنها جات كلمة ” برجوازية ” المعروفة وولات الكلمة ف اللغة الهولندية كتعني المواطنين من بعد، و ميستر وكتعني السيد او الرايس. و منصب العمدة عندو صلاحيات كثيرة ومطلقة ف تسيير البلدية ديالو، كاييعين البوليس و المديرين و المعلمين و كاع الموظفين ويقدر يجري عليهم الا بغا ..وكلشي تابع ليه وتحت امرو ومايقدر تا حد وخا الحكومة الفدرالية تفرض عليه اي حاجة ف السياسة الداخلية ،و البلدية تقدر تشرع قوانينها الخاصة ف كاع المجالات وخا تكون مختلفة على بلدية قريبة ليه، كما ان البلدية عندها مدارس ديالها و بزاف د الخدمات كتقدمهم على المستوى الاجتماعي و الاقتصادي..المهم العمدة البلجيكي نقولو هو “رئيس البلدية و القايد و العامل و الكوميسير” ديال المغرب مجموعين فيه.
نتائج الانتخابات جابت مفاجاَت كما العادة، حزب NVA الرابطة الفلامانية اللي هو من اكبر الاحزاب و اللي مشارك ف الحكومة الفدرالية ديما رابح ف البلديات الفلامانية وخا مزاحمو حزب الخضر شوية وخصوصا ف بلدية انفرس اكبر مدينة ف الجهة الفلامانية من بلجيكا، و بطبعية الحال كاين الحزب الديمقراطي المسيحي تاهو جاب عدد كبير من الاصوات ومعه الحزب الاشتراكي . ولكن المفاجيء هو حزب صغير ديال اليمين المتطرف سميتو المنفعة الفلامانية Velams belang ربح بزاف د المقاعد ف الكثير من البلديات بل عندو الاغلبية ف قرية دندرلو و نينوف القريبة من بروكسيل و الافكار ديالو كلها على رفض الهجرة و رفض الاسلام و بغاو يخرجو من الاتحاد الاوروبي و شي مرات كايولو بغاو منطقة الفلامان تتسقل كاع على بلجيكا ولكن المهم جايبين بزاف الاصوات غير من تخويف المصوتين من المسلمين و اللاجئين..هاد الحزب الصغير بغا يشد رياسة البلديات اللي عندو فيها الاغلبية ولكن بغا يتحالف مع الحزب د nva اللي قريب ليه ف الافكار ولكن هاد الاخير كايرفض التحالف حيث مابغاش يوسخ راسو مع اليمين المتطرف كما كايقول الرايس ديالو بارت دي ويفر عمدة مدينة انفرس.
الجديد ف هاد المنطقة هو مغربي شاب سميتو محمد رضواني، اصلو من الناظور، من الحزب الاشتراكي ربح بزاف د الاصوات ف بلدية لوفان،اللي معروفة كونها مدينة جامعية، وغادي يكون هو العمدة الا تحالف مع حزب الخضر او غيرهم . فوز هاد الشاب اللي من فعمرو اربعين عام، كان بسبب عملو و مجهودو الكثير ف العمل الجمعوي حيث كان رئيس جمعية ” اهلا” الثقافية كما كان معروف ف عملو السياسي الجاد ملي كان مستشار جماعي.
ف المنطقة الوالونية اللي كايهضرو فيها الفرنسية كان تنافس بين الحركة الاصلاحيةMR ديال رئيس الوزراء شارل ميشيل و الحزب الاشتراكي اللي عندو شعبية كثيرة حيث تهلا ف الناس من ناحية التعويضات د الشوماج و السكن و غيرها من الامور ملي كان ف الحكومة من قبل،كما معروف عليها تسهيلاتو للمهاجرين ،ولكن المفاجأة ف هاد المنطقة هي صعود حزب العمالptb اللي عندو افكار ماركسية شوية و هو اقترح يدير تحالف مع الحزب الاشتراكي باش يسيرو شي بلديات بعيدا عن الليبراليين ب ديال الحركة الاصلاحية و الحزب الديمقراطي المسيحي.
ف منطقة بروكسيل اللي فيها المهاجرين و المواطنين من اصول مغربية و تركية هما الاغلبية ، ف القضية كانت مرونة شوية،شي بلديات ماكانش فيها تغيير كثير، ولكن ف مولنبيك المغاربة استطاعو يطيحو العمدة السابقة من حزب الحركة الاصلاحية فرانسواز شيبمان و يطلعو الحزب الاشتراكي مرة اخرى اللي كان معروف ديما طالع ف هاد البلدية ، و العمدة الجديدة غادي تكون كاثرين مورو،40 عام ،طبيبة ، وهي بنت العمدة التاريخي فيليب مورو، اللي كان معروف عند المغاربة بالشيخ مورو، السيد لدورات كثيرة كان هو اللي شاد كلشي ف مولنبيك و تساهل بزاف مع المغاربة سواء كانو مهاجرين او مواطنين او بلا اوراق و كان عطا الاوامر للبوليس يترخاو ف بزاف د الامور..الاعداء ديالو كانو كايقولو بسبب انه بغا يتقرب من المغاربة و بغا اصواتهم ف طلق اللعب بزاف للاسلاميين و السلفيين و كان اي واحد يقدر يفتح مسجد ف شي كاراج حتى ولات مولنبيك بحال شي “كيتو “مغلق و خرجو منها الارهابيين و المصايب الكحلة، و هاد الشيخ مورو طلق مراتو ملي شرف و تزوج واحدة من اصل مغربي وكان كايهضر الدارجة كاع حسب شي مصادر..المهم اعتزل السياسة و خلا بنتو “تناضل ” بلاصتو..و للاشارة كانت هي ضمن وفد برلماني مشاو للحسيمة فاطار الاستقصاء على حراك الريف ودارو تقرير عليه مافيه فايدة..
المهم دابا بنتو هي اللي غادي تكون عمدة الا لقات كيفاش تدير تحالف مع ptb ولا الخضر..وخا بزاف من المنافسين ديالها كايتهموها بلي خرقات بزاف من قوانين الحملة الانتخابية حيث فريقها الاعلامي نشر بزاف د الاشاعات بحال منع اشاعة الذبح الاسلامي بشكل نهائي فبروكسيل من طرف منافسين الا نجحو و اعتمدو على الفايسبوك فنشرها و استعملو الريفية و العربية ف الدعاية و هي لغات ماشي رسمية،كما دارو تجييش للمساجد بل و اعطاو وعود باش يعطيو السكن الاجتماعي و يوسعو من الاستفادة من فلوس نظام المساعدة الاجتماعية المعروف باسم cpas ، وهاد النظام كايمشيو ليه الناس، وخا يكونو اجانب، اللي ماقادرينش على الخدمة او فقراء بزاف، والغريب ان 12 الف شخص اغلبهم من اصول مغربية كايستفدو منو و كايديرو فيه التخلويض و هادشي اعتمد عليه اليمين المتطرف بزاف باش يدير دعاية ضد المغاربة و المسلمين و ديما كايناديو هاد اليمنيين باش يتدار تعديل لهاد النظام..وهادشي علاش مولنبيك من افقر البلديات ف العاصمة.
المهم المغاربة فرحانين ملي طلع الحزب الاشتراكي ثاني ف مولنبيك، وخا على المدى البعيد ماشي ف صالحهم حسب متتبعين حيث كايشجع الاتكالية و بالتالي هروب بزاف د المصوتين نحو اليمين المتطرف ،اما المرشحين المغاربة الاخرين ف هاد البلدية مامشاوش بعيد ،خصوصا بحال واحد الحزب صغير سميتو ” حزب اسلام ” دارو وحد شيفور د الطوبيس ،دار شي مرشحين و شي شوهات اعلامية بحال ملي قال انه بغا يطبق الفصل بين الرجال و العيالات ف النقل و الخدمات العامة و شي تخربيقات اخرين شوه فيها المغاربة و المسلمين.
بلدية اخرى صغيرة ف جهة بروكسيل يقدر يطلع فيها مغربي وهوي كوكلبرغ، و اللي يقدر يكون عمدة هو احمد لعوج وهو شخصية محترمة بزاف ف الحزب الاشتراكي ومن طرف جميع نخبة العمل السياسي ف بلجيكا حيث هو رئيس الفريق الاشتراكي ف البرلمان الفدرالي…أما بلدية كانسهورن فطلع فيها اب اللاعب د المنتخب كومباني،السيد غادي يكون اول عمدة من اصل اجنبي لهاد البلدية، و كاع مامنتمي لي حزب،دار لائحة ديالو خاصة وربح بالاغلبية المطلقة، يقدر اعتمد على الشهرة ديال ولدو ف الكرة.
اما بلدية سان جوس فبقات ديما ف يد الحزب الاشتراكي و الرايس ديالها هو التركي امير كير،و بلدية سكاربيك و اندرلخت فما وخا فيهم بزاف د الاتراك و المغاربة ماداروش تغيير بزاف و غادي يبقاو فيها نفس الرؤساء مع صعود كبير لحزب الخضر اللي بالمناسبة الرايسة ديالو هي ذات الاصل المغربي زكية خطابي اللي غادي تكون مستشارة ف بلدية ايكسيل، ومعها عشرات من المغاربة اللي غادي يكونو متستشارين تاهما ف العديد من البلديات اللي طلعو فيها.
المهم دابا بداو المفاوضات بين الاحزاب على التحالفات و يقدر تكون ترشيحات اخرى جديدة.