فضيحة هزّات ولاية أمن طنجة.. تهريب بزناز سالا باعتقال 4 ديال البوليس

فضيحة خايبة بزاف هزات ولاية أمن طنجة. هاد لفضيحة كتعلق بتهريب شي تاجر مخدرات كان مبحوث عليه على الصعيد الدولي من قبل شي بوليس غيّبوا ضميرهم المهني . هاد القضية دخل فيها عبد اللطيف الحموشي المدير العام ديال الأمن الوطني بيديه واعطى تعليمات واضحة باش يكون تحقيق شامل لتحديد وترتيب المسؤوليات.
وحسب مصادر “كود”، فإن هاد التحقيق بدا بشكل دقيق وشمل مسؤولين أمنيين كبار ف عاصمة البوغاز. كولشي كان شداه الخلعة حقاش قضية ماشي ساهلة وكولشي بدا يساين الدقة ديالو. ووفق ما كشفت عنه مصادر “كود”، فإن التحقيقات تسلات باعتقال 4 ديال البوليس، وإحالتهم على الوكيل العام للملك.
هاد البوليس دبا صيفطهوم للسجن المحلي ووجهت لهم تهم ديال “القيام عن علم بتهريب شخص من البحث ومساعدته على الاختفاء والتدخل بغير صفة في وظيفة عامة والتواطؤ على أعمال مخالفة للقانون والارتشاء والمشاركة”.