لاگاردير ملوك “الكان” “احتلو” منصة الصحافيين فماتش المغرب البينين

مجموعة “لاگاردير” الفرنسية المالكة لحقوق نقل مباريات كأس افريقيا للامم واللي باعتها للقطريين “بيين سبور” بعقد احتكاري ما عندو مثيل٬ هجمات على منصة الصحافة. هاد الفرنسيين كيعتابرو كلشي مباح. يستحيل يديرو هاد الشي ففرانسا او اوربا. قبل ماتش المغرب البينين عن ثمن نهاية كأس افريقيا للامم احتلت الشركة الفرنسية تريبون الصحافة. جات ودارت اليد علي نص المقاعد.
طبعا حتى حد ما يقدر يهدر معاهم. منصة الصحافة فالعالم كولو ملك الصحافيين المعتمدين. اييه كاينين شي وحدين ماشي مهنيين ومعتمدين كصحافيين٫ ولكن هادي قصة اخرى ما تعطيش الحق ل”لاگاردير” دير اللي بغات.
لكراسى اللي خداتهم عطاتهم لناسها وضيوفها. الغريب ان منصة الصحافة هى ملك للصحافة المكتوبة ولا تدخل ضمن بنوذ العقد الاحتكاري فحتى الفيفا والاتحاد الأوروبي لا تتجرا على التطاول على منصة الصحافة المخصصة للصحافة المكتوبة. الحكرة فافريقيا وصافي.