قضاة فكازا كاعيين على تنقيلات المجلس الاعلى وهدرة على قرب نشر لائحة “قضاة خالدين” ومصدر ل”كود”: تغيير 5 قضاة بالنيابة العامة بقضاة ما عمرهم مارسو عمل هاد النيابة غريب

نشرت “كود” خبرا على التنقيلات الاخيرة للقضاة اللي جات فاخر دورة لاشغال المجلس الاعلى للسلطة القضائية. بحال اي تنقيلات ما عبجاتش كلشي. متتبع للشأن القضائي قال ل”كود” عن كازا وقالو باللي هاد التنقيلات ما كانش كلها موفقة. كيفاش؟
المصدر قال ل”كود” باللي لا يعقل نقل 5 قضاة بالنيابة العامة القطب الجنجي فكازا ويتم تعويضهم بقضاة ما عمرهم مارسو عمل النيابة العامة وفيهم اللي كان فالمحكمة التجارية.
هاد المصدر اعتابر باللي قرار بحال هادا غادي يضعف النيابة العامة لانو ما يمكنش لقاضي فالتجارية او لاخر اللي جا من المحمدية يعرف المساطر الجنائية وباللي هاد الشي يتعارض مع الهدرة ديال التخصص ودائرة الاختصاص وووو
كاينة نقطة اخرى يضيفها المصدر ل”كود” وهي ان هاد التنقيلات ما شملاتش كاع القضاة. دابا دايرة هدرة على شي قضاة دوزو اكثر من عشرين عام ما شملهم هاد التغيير. هاد المصدر ما هدرش على نزاهة هاد القضاة او استقامتهم بل على انه فدستور 2011 خاص التغيير يكون باستمرار تفاديا لدخول اي مسؤول فالقضاء او غيره فلعبة المصالح. على هاد القبال كيروج باللي غادية تخرج لائحة ما يسمونهم “القضاة الخالدون” او “المعمرون” فبلاصتهم.
ها حنا كنتسناو. واش كاينة لائحة بصاح ولا غير تصفية حسابات واللي ما خداش اش كيتسنى باغي ينتاقم وصافي.