قضية الصحافي توفيق بوعشرين. منين نبداوها. القضية اعتداءات جنسية واش مسموح السؤال علاش غير هو ولا اللا وكيفاش ضحايا سبق صرحو باللي بغاو يحطو شكايات بالمجرد وما تقبلاتش وعلاش ما وقعش هاد الشي مع ما حدث ف”دوزيم”

قضية توفيق بوعشرين مدير نشر “اخبار اليوم” منين يقدر يبداها بنادم. الوكيل العام فبيان ليه البارح قال باللي القضية عندها علاقة ب”اعتداءات جنسية” وباللي كاينة “شكايات”. غير باللغة ماشي بالقانون كيعني انه عندو على الاقل 3 شكايات فهاد الشي ديال “الاعتداءات الجنسية”. جوج منهم صبحو معروفات. وحدة تتهمه بالتحرش. بجوج هادو كانت عندهم علاقة بالجريدة. خدمو فيها او دوزو سطاج.
حتى لهنا فدولة الحق والقانون ومع هاد الحملة ديال محاربة الاغتصاب على الصعيد الدولي اللي بدات فهوليود وطيحات باكبر منتج فيها ودازت لفرنسا ودات معاها طارق رمضان٬ هاد الشي مقبول. ماشي غير مقبول ولا زدنا عليه القانون الجديد اللي صادق عليه المغرب مؤخرا فموضوع التحرش خاصو يكون.
غير القضية ماشي بهاد البساطة. اول حاجة اللي كلشي خاصو يكون حاسم فيها هو ان الواحد ماشي غير كيضامن مع الضحايا الصحافيات. الصحافيات تعرضو فهاد البلاد السعيد لعمليات كثيرة مشابهة. ما عمر شي حد داها فيهم. ما عمرهم تنصفو. الاغتصاب او التحرش او كل ما له علاقة بالاعتداءات الجنسية فالمغرب خاص كل واحد يحاربو. دول بحال اسبانيا كانت بحالها هادي فترة ماشي بعيدة واليوم مع التحسيس مع دور الاعلام مع دور الحكومة مع القضاء غادي وينقص ونقص بزاف بزاف.
فقضية بوعشرين دابا اصوات كثيرة فيها السياسي والاعلامي والحقوقي ربطات هاد الملف كولو برغبة جهات باسكات كاتب رأي عندو استقلاليتو. هاد الشي تقال فتدوينات ديالهم. يعني كاينة شكوك كبيرة فهاد الملف عند هاد الناس. اللي يزيد يغذي هاد الشي قضايا كثيرة اثيرت فالاعلام فالسنوات الاخيرة حول “الاعتداءات الجنسية”. وقع هاد الشي فدوزيم” فعهد الادارة الحالية او فالعهد السابق. فهاديك لوقيتة كان صحافي بالفرنسية كيتحرش وبزاف بزاف بالصحافيات. وقع مع سعد لمجرد اللي سبق لشهادات لمغربيات خرجات فالانترنيت كتقول باللي تعدى عليهم جنسيا وشي وحدة كتقول باللي مشات حطات شكاية كاع عند الشرطة مع والدها ورفضو الشكاية والسبب حقاش ماشي فيارج. وقع لمسؤولين عن صحف فالسابق كانو دايرين بولة فمكتبهم ضوها كيقول واش السي المدير مشغول باعتداؤو الجنسي.
هاد الشكوك كيردو عليها خراين. هاد الحالات تقدر تكون ولكن ما عمر كانت فيها شكاية ووصلات النيابة العامة. ثم راها دازت ودابا عهد جديد.
كاينة نقطة اخرى فشي شكل وهو ارسال عدد كبير من الشرطة حتى الناس عادو يقولو بوعشرين رسلو ليه عشرين صحافي. وعلاش هاد الفيلم الهوليودي وما يكونش استدعاء. هاد الشي كان فيه نقاش حتى فالحكومة وفق مصادر “كود”. غير هاد الشي مردود عليه كيف قال شي حد مطلع على القانون ل”كود”. شرح باللي هاد الشي قرر فيه الوكيل العام والشرطة نفدات تعليماتو وباللي الهدف منها هو مفاجأة المتهم باش ما يكونش عندو الوقت يمحي دليل او يضغط على ماليات الشكايات. شي وحدين خراين كيقولو “بوعشرين عندو افتتاحيات قوية قاصحة سميها اللي بغيتي ولكن باش تكون فهاد الوضع خاصك تكون كلين وواضح وما تخليش لشي جهة تشدك. لا ضرائب لا قضاء لا والو والو. هو عارف فين عايش وعارف تبعات ديال هاد الشي.
الحاصول هو متهم دابا. اليوم ممكن الوكيل العام يقرر مصيرو ويقدمو. القضية غادية توضاح اكثر مع اتصال المحاميين بيه. حتى توضح هاد الصورة جريدة “اخبار اليوم” غادية تبقى تصدر. هادا خبر زوين وسط هاد الاخبار الخايبة اللي بدات من نهار تعتاقل