وديوها فالخوا الخاوي: ها الحكومة غادية تخسر امام اللوبيات لكبار مرة اخرى. وزيعة "كاب 22" بدات ووجدوها باش يديها البراني ولا صاحبهم اتياس. الوزيرة مولات 22 ساعة اتصلات بيه باغية تشوفو

اطلقت وزارة الداخلية طلبات عروض بخصوص الشركات اللي بغات تدخل للمنافسة على مارشي "كاب 22" لكبير اللي غادي يكون فاخر العام بمراكش. طلبات العروض حسب مصدر "كود" داروه جوج الناس جابوهم من فرنسا. اللي قراه كيظهر ليه باللي ما يمكنش للشركات المغربية اللي كاينة ف"ليفيمونسيال" تربحو. خاصك 150 مليون درهم رقم معاملات وتكون كديرها ف3 السنين الاخيرة "باش دارو هادي راه باش يكولو لينا سيرو تلعبو" يقول صاحب احدى الشركات المتخصصة في التنظيم ل"كود". طبعا دايرين شروط اخرى تعجيزية "يمكن لينا نظموه ولكن خاص الدولة تبغي. ممكن يتجموع شركات التنظيم 4 او 5 الشركات ونظموه احسن من الاجانب" يضيف مصدر "كود".
دابا هادوك اللي باغيين يعطيو المارشي للاجانب كادو كلشي. اول اسم بدا كيروج هو اتياس اللي كان دا "القمة العالمية لريادة الاعمال" فمراكش وبلا طلبات عروض ب7 مليون دولار. اليوم اسمو بدا كيخرج فالصحف باش يكولو راه واخا فرانساوي راه من مواليد فاس.
حسب مصدر "كود" حكيمة الحيطي الوزيرة المنتدبة المكلفة بالبيئة اتصلت بهاد اتياس راجل سيسيليا اللي كانت متزوجة بساركوزي. دابا هاد السيدة مكلفة بالديبلوماسية اي دوران وعلاش اتاصلات بهاد السيد وكالت ليه باغي نشوفك؟ ما عارفش.
بعد وزيعة الصفقة غاديين يعطيو الفتات لبعض الشركات المغربية اللي مصاحبين معاهم "الخطير فهاد الشي هو ان انشطة بحال هادي اللي خاصها تحرك لبلاد كتولي مناسبة باش تخرج العملة الصعبة منو. ايلى خداوها الاجانب غاديين يديو فلوسهم والمغرب ما مستافذ والو" يشرح مصدر "كود"