هادوك اللي خرجو على الدولة باش تكلفو بالصحافة الاجنية فالذكرى 20 لعيد العرش خاصهم يخلصو. ما عندهم اختصاص وعلاقاتهم كاينة غير بالفلوس وعادي الصبليون وحتى لفرانسيس يوجهو المدفع هاد ليام

باش خرجنا ف”كود” مقال تحليلي نشراتو “لوفيگارو” على عشرين سنة من حكم محمد السادس وفيه سليخ للمغرب ولهاد المدة من جريدة ديما محسوبة مع المغرب٬ مشى بال قراء “كود” باللي هادي مسؤولية كريم بوزيدة المكلف بمهمة فالديوان الملكي. علاش حقاش من مهامو قضية التواصل.
طبعا هاد الشي كيقولوه اللي ما عارفينش كيفاش كتكون الامور. بوزيدة ما عندو علاقة بالصحافة الدولية. هاد الصحافة ومنها الفرنسية كيف فالسابق٬ ديما عند للمغاربة دخلات كثيرة ماشي دخلة وحدة. يمكن اللي كيتعامل مع لوفيكارو وصحف مجلات يمينية ماشي هو اللي كيتعامل باسم الدولة٬ مع صحف ومجلات وقنوات وصحافيين يساريين.
وهاد الشي ممكن تقيس بيه على صحف دول اخرى. فقضية لوفيگارو كاينين وحدين اخرين قدمو ريوسهم وبداو كيخدمو فهاد الملف. اعتقدو باللي نشريو عدد خاص ف”لوبوان” على المغرب راه حلينا المشكل. جا مقال “لوفيگارو” باش يصرفقهم. ماشي كلشي بيع وشرا. خاص المصداقية. ماشي مقالات “جون افريك” ولا هادوك المقالات ديال “لوبوان” اللي باغيين تغمقو بيها وتقولو راكم خدامين.
التعامل خاصو يكون بعيد على الربح والخسارة. اللي كيدير البيزنس خاصو يبقي يدير لفلوس ويبعد علي امور ما عارفهاش. النتيجة كتكون هي اللي وصلنا ليها.
صحافة اسبانية دخلات فالمؤسسة الملكية فالمغرب دخلة خايبة هادي تقريبا شهر. مقالات على التجسس علي اليخت الملكي على ثروة محمد السادس على الفقر علي ما هو سلبي وصافي. هاد الشي كانت فيه الصحافة الاسبانية موحدة. مواقعهم الاكثر مقروئية. صحفهم المحافظة والليبرالية وذات التوجه الاشتراكي كلها كانت على نغمة التصرفيق للمغرب.
اذن باش ما كيكونش الاختصاص ويزيد عليه الجبهة كيعطي هاد الشي. حتى صحاب المملكة كيديرو يديهم ويبداو يضربو.