شد لي نعكل ليك خرجات على هاجر الريسوني. المسكينة ما غادياش دير العرس نهار 14 شتنبر حقاش اللي كيدافعو عليها طلعو البارة بزاف بزاف والجيهة لخرا ما بغاتش تكبر عقلها

كان ممكن دير هاجر الريسوني الصحافية فاخبار اليوم اللي متابعة بتهم متخلفة “الاجهاض” وتخربيق اخر٬ دير عرسها نهار السبت الجاي 14 شتنبر. كان ممكن يحضر ليه صحابها وعائلتها. دابا اللي اكيد انها ما غادياش ديرو. ما غادياش تضرب الكاعظ السبت مع صديقها السوداني.
علاش كان ممكن؟ حقاش المزايدات قتلات كلشي. المزيدات من هاد الجهة او ديك ضيعاتها. خلاتها مليوحة فالحبس. ما يمكنش تتمنى شي حد ما بالك ببنت شابة عندها 28 عام مقبلة على الحياة. ما عمرها قلبات على صداع.
النيابة العامة ومعاها الدولة ركبات راسها. دارتها ووحلات فيها. باش بغات دير شي جيست لقات راسها فات الفوت. حتى هي ركبات راسها وحلفات ما ترجع خطوة للاور. على الاقل المتابعة فحالة سراح ما بغاتش تعطيها ليها. المجلس الوطني لحقوق الانسان وجمعيات نسائية وحقوقية محترمة طالبات باطلاق سراحها. بحالها بحال جمعيات حقوقية دولية: هيومن رايتس وامنيستي وصحافيون بلا حدود. هاد الضغظ لحد الان ما عطاش نتيجة.
الجهة الاخرى المدافعة على هاجر الريسوني صعدات بزاف. طلعات البارة. طلعات اتهامات ضد الامن ضد النيابة العامة ضد الدولة. دخل فيها الامير هشام وبغى يصفي حسابو مع ولد عمو الملك محمد السادس. جبد ليه امارة المؤمنين وحقوق المرأة. هو عارف باللي كان كيمارس دور المعارضة لولد عمو ولكن كان فاهم باللي الثمن هو تغراق هاد البنت.
دابا الحقيقة الوحيدة هو ان هاجر ما غادياش دير عرسها. بسباب تخلف الجميع. استغلال الجميع لقضيتها.