إسرافيليات: الكائنات الفضائية هي اللي قتلات لشقر والمخزن بريء من دمه!

يبدو أن دعوات الشيخ الهمام حبر الأمة ومجددها العارف بالله وشمس العلوم مولانا عبد الحميد أبو النعيم قد أخطأت هدفها ،فعوض أن تصيب لشڭر قد إختارت إشتراكيا اَخر إسمه لشقر ،حرف واحد قد أنقد حياة القيادي الكبير والمحنك السيد إدريس لشڭر،الحمد لله على نجاته ،والصبر والسلوان لعائلة الفقيد !

إلا تيقنا رواية عائلة كريم لشقر والتي تقول أن البوليس ديال الكوميسارية ديال الحسيمة هو المسؤول عن وفاة إبنهم البالغ من العمر 38 سنة ،حيث يبدو أن لكمات وركلات البوليس كانت أسرع من إتصال هاتفي من المكتب السياسي لحزب القوات الشعبية الاشتراكي, كان ينتمي له الراحل في مرحلة معينة ، والذي أحيانا يتدخل من أجل إطلاق فلان او علان لأنه ينتمي للحزب او شبيبته او لأنه عضو سابق..الخ! وربما لو كان قاف سمير "ڭافا" لما تم اعتقاله أصلا وكون ضربو ليه البوليس السلام وتمنوا له ليلة سعيدة هو ومن كان معه ! قاليك طالب عم الضحية الدكتور امحمد لشقر وزارة العدل والحريات التي يرأسها المصطفى الرميد، بالقيام بكل التحريات، قصد استجلاء "الحقيقة كاملة غير منقوصة" في ظروف وفاة إبن أخيه ، واشتي من هادي الڭارو، تيصحاب ليه واشد احنا بحال دوك الدول المائعة لي تتنوض قربالة ملي تيموت شي مواطن ، اليوم قاليك تحقيق، وغدا المطالبة باستقالة المدير ديال الامن الوطن ان اكد التقرير تورط عناصر في مقتل هذا السيد ، ومن بعد يقول على وزير الداخلية اصدار بلاغ او عقد لقاء صحفي تيشرح فيه هذا الحادث ،ويقدر ڭاع يزعم ويقول ليك انا قنواتنا التلفزية المجيدة عوض روبرتاجات جمعيات حماية القنفد الصحراوي في محاميد الغزلان او تصدير زيت الاركَان المحلى بورق الكلبتوس في اشتوكة ايت باها ..؛تدير شي روبورطاج تيدوي على مقتل هذا الرجل .. وها احنا ولينا فالمزاح...!
شوف اسي المخزن قال في بيان للأمن إن عناصر الشرطة العاملة بالسد القضائي المنصب بمدخل الحسيمة أوقفته وهو على متن سيارة على الساعة الثالثة صباحا في إطار مراقبة روتينية، و صرح نفس المصدر أنه تم نقل الشاب الموقوف مباشرة نحو المستشفى بسبب حالة السكر المتقدم ، وشتي المخزن شحال ضريف ، لكن عم الضحية قاليك (مرفوق بصور ) إن الجثة كان عليها أثار تعنيف ، واش دابا احنا غنكذبوا المخزن والبوليس لي كل واحد فيهم 12 شاهد ،تعبئة مضاعفة تناشر مرة متديرهاش حتى ميديتيل ، ونتقيوك انت ، المخزن الى قال بلي حتى مركبة فضائية هي لي قصفات السيارة لي كان فيها الفقيد قبل اعتقاله ، راه عندو الصح ،المخزن معقول!

العام الفايت وقع بحال هاد الستون فإسلاندا ،واحد بوليسي قتل مواطن شارف ستيني كان هاز بندقية صيد وتيتيري فالناس فالزنقة، الفرق الوحيد هي ان هاته هي أول مرة في تاريخ إسلاندا يقوم شرطي بقتل مواطن !!! ويلي شحال ضريفين ، وعندهم دولة كاملة يالله فيها 600 شرطي نظرا لتدني نسبة الاجرام ! والبوليسي قبل ميتيري حاول يهضر معاه ،وبقاو تيتفاوضو 7 سوايع ،وجا طبيب نفساني تيحاول يكالمي خونا ،ولكن والو ..الساط بدا تيتيري جابها فجوج ديال البوليس ، صافي هو ينيش عليه المخزن ديال شهبين الريوس! من بعد الإعلام حيح ،والناس حزنوا والشرطة قدمات اعتذار ورئيس ديال البوليس السيد هالدر جوهانسن دار مؤثمر صحفي قدم في اعتذار للشعب الايسلاندي! واش دابا هاد السيد عم الفقيد باغينا نديرو بحال هاد المسخ ديال هاد الكفار؟!

نصيحة للخوت..الشراب أند صوڭان ،دونت ميكس ..خلاها الرئيس البطل ..والله يبعد عليكم الكائنات الفضائية.