الداخلية كتاكل ولادها. انتقام وضيع من تركة الشرقي اضريس واهانة لولاة وصلو للتقاعد وزادوهم بحال البجيوي

وزارة الداخلية كتاكل ولادها. شكون كلاها. تقنيوقراطيون يالله وصلوها ما دازوش على كاع المناصب من قايد وباشا ورئيس دائرة وكاتب عام قبل ما يولي عامل فوالي. هاد العينة كيقودها دابا عبد الوافي لفتيت وزير الداخلية والوزير المنتدب في الداخلية نور الدين بوطيب. بجوجهم قراو فباريس شي فالمدرسة المركزية بباريس -بوطيب= وشي فالقناطر بحال لفتيت. هادو جاو كيريبو اللي كان فالسابق.
مزيان يكون العقاب ومزيان يعرفو الولاة والعمال باللي كاين هناك مراقبة ولكن راه العقاب الاداري بلا عقاب قانوني =محاكمة= كيضرب فالصميم دولة الحق والقانون. كيبين باللي كاينة امور اخرى ما عندها علاقة بالتقصير فالمهام.
ناخدو قضية عبد الفتاح البجيوي. دوز ولايات قبل ووصل لمرحلة التقاعد. اش دارو معاه؟ جابوه لمراكش قبيل كوب 22 وداز كوب 22 مزيان. السيد بقى فمنصبو. فين ما كان شي نشاط فمراكش فالسياحة فالاستثمار فالاعياد الدينية لليهود لا المسيحيين ولا المسلمين لا وهو حاضر. حاضر اكثر من القياس. موحالش شي والي كيواكب انشطة بحال كيف كيدير هو. يقدر يكون دار تقصير فالاستثمار ممكن. ولكن هاد الشي ما خاصوش بيان يجري عليه. خاص تحقيق يديرو القضاء. قضاة جطو ماشي قضاة ينزلو اللي بغاو ويجريو علي اللي بغاو او يحيلو على الادارة المركزية اللي بغاو. هاد الشي هواية وانتقام وتخربيق.
نشوفو مع عامل سيدي بنور مصطفى اضريس. دابا اش من استثمار وقع فهاد المنطقة ويكون العامل وقفو. ثم هاد العامل راه غير تابع للوالي ديال جهة الدار البيضاء. واش يقدر ياخد شي قرار كبير بلا ما يرجع للوالي. بحالو بحال هادوك العمال. باينة فهاد الحالة محاولة الانتقام من الشرقي اضريس عبر اخيه. المشكلة انو العامل الوحيد اللي تعرفو لمغاربة على ورقة الاعفاء موقعة من وزير الداخلية لفتيت. بان ليكم غير بوحدو.
ندوزو لعامل الحسيمة. هادا عامل يالله جا. حيدوه وطيروه والوالي ديال طنجة الحسيمة تطوان اليعقوبي اللي اسمو ارتبط بالحراك فالريف بالصداع فالحسيمة ما قربوش ليه. وفهمو شي حاجة