آش هاد التنمر. علاش غادي نقتاحمو حياة بنادم الشخصية واش ما منحقش المنتخب ولا السياسي ينشط ويضحك ويلعب

[email protected]
التنمر أصبح داء يصعب معالجتو فبلادنا. يصعب أننا نلقاو ليه علاج لأنه ممارسة مرتابطة بشخصية الإنسان وكل شخصية وأوجه التنمر لي كتعبر عليه. كاين لي كيعبر عليه باش يعوش نقص أو حقد لأن لي كيتمارس عليه هاد التنمر غني او بوكوص أو عندو قوة وإيجابيات معينة كتخلي الآخر يتقرص منها وكيعرف راسو ما يقدرش يوصل ليها.
البارح السبت تلاح فيديو ديال الشبخة طراكس خلال زيارتها لمدينة العيون باش دير حفل فمدينة المرسى تخليدا للذكرى 44 لعيد المسيرة الخضراء. هاد الحفل وعلى الرغم من حملة المقاطعة الناس حضرات لهاد المتنفس ونشطات وخرجو شي وحدين بفيديوات كيسبو فيها رئيس جماعة المرسى بدر الموساوي علاش يجيبها. والتناقض كان كبير لأن اغلب هادو لي كينتاقدو حضورها دارو فيديوهات وتصورو فالحفل مع حمولة من السب والتنمر فحق الطراكس. يا ودي إذا ما بغيتيهاش ما تجيش للحفل ديالها وثانيا راه ما يمكنش نشوفو رأي 1 فالمائة أو 10 فالمائة ونخليو 90 فالمائة باغة تنشط وتضحك وتروح على راسها.
الأكثر من ذلك تم تسريب فيديو من داخل دار رئيس جماعة المرسى بدر الموساوي ولي بانت فيه الشيخة طراكس محيحة كما العادة. غنات وفوجات على بنادم. هاد الفيديو تم تداولو بشكل واسع مع كمية تنمر غير طبيعية فحق بدر الموساوي. واش السيد ما منحقوش ينشط ؟ واش السيد ماشي بنادم بحال أيها الناس يلعب ويضحك ويفوج. فين المشكل ؟
إلا إقتحام خصوصية بنادم. الانسان خاصو يديها فشغلو ويديها فسوق راسو. كل واحد فينا عندو جانبو الخاص وعندو حياتو الشخصية. واش المنتخب ما منحقوش يشطح ويفوج ويغني. راه إنسان بحالنا بحالو. وهادوك الأمة ديال عباد الله لي كانو معاه ما شفتوهمش. إلا خصوصية بنادم وحياتو الشخصية ما نهدروش فيها. يمكن ليك تحاسبو على حصيلتو كمنتخب ويمكن ليك تعاتبو كسياسي. ولكن باش توقف فوجه حياتو الخاصة فهادشي غير مسموح وحريتنا تتوقف عند حقوق الآخر. حقو فالعيش حقو فينشط ويضحك ويلعب. راه كاينة حقوق أكثر من هادي كاع.
فالصحرا كان بنادم داخل سوق راسو وكنشوفو دائما بنادم كيسيِّج نفسو بحقوق الآخر. فرمضان على سبيل المثال كاع كنشوفو بنادم كيفطر وعادي تا حد ما كيهدر معاه لأنه شأن بينو وبين نفسو وربو. وكاين لي كيدير الويل لكحل وعادي شغلو هاداك. ولكن باش نجيو نحاسبو شخص على حياتو الخاصة هادشي غير معقول وغير مقبول فمجتمع عارف حدودو. علاش واش ما عمر شي حد فيكم حضر عرس أو حفل أو مناسبة نشط فيها -بكافة الطرق- واش بنادم ما عمرو ضحك وشطح فعرس ختو أو خالتو او بنت خالتو أو عمتو ؟ حتى هادي راه حفلة خاصة وكتعني الناس لي حضراتهم. وباش تاخد السيد وتقتاحم حياتو الشخصية وديرو في مقصلة لا. حاسبوه فكلشي إلا حياتو. الديور راه حرمة. وإذا جيتا نشوفو شنو كيوقع فكل دار فراه غادي تنوض فتنة كاع.