دابا وحدين مالقاوش مستقبل هنا وهاجروا برا باش يديروه ويعيشو فالدول ديال حرية التعبير وحقوق الإنسان والحيوان والقوى الإقتصادية العظمى وفاللخر يجيو يعلمونا شناهي الوطنية حنا لي باقي حاصلين هنا

علاش نهار كيدير شي واحد شي سلوك يمكن اعتباره كيمس بالدولة المغربية بحال ديك ختنا لي حرقات الراية، كتلقى أغلب هادوك لي كيبانو فالساحة كيدافعو على الوطن وراية الوطن ودايرين فيها أنهم تقاسو بشكل شخصي جراء حبهم للبلاد أغلبهم غير النصابة والمراقة ولحاسين الكابة والأشكال العجيبة والغريبة ولي مكتشرف لا راسها لا الوطن ومعروفين مابيهم لا وطن لا ستة حمص وبيهم غير يبيضو وجهم مع السلطة ويبانو في الساحة، وديما كتلقاهم هدرة جوج الصحرا مغربية، واخا يكون الموضوع على جزيرة ليلى أو حرق الراية أو هجوم المارينز على آسفي غادي تلقاه كيردد بلي الصحرا مغربية، زعمة غير لي أقر بمغربية الصحراء راه أكثر وطنية من لخرين، وطبعا هاد الأشكال لي كيخرجو ديما فهاد المناسبات كتلقى أغلب البيانات ديالهم عامرة أخطاء وإلى فيهم شي جوج قاريين فاللخريين غير تابعين جيلالة بالنافخ والباقي كائنات أحداية الخلية.
دابا وحدين مالقاوش مستقبل هنا وهاجروا برا باش يديروه ويعيشو في فالدول ديال حرية التعبير وحقوق الإنسان والحيوان والقوى الإقتصادية العظمى وفاللخر يجيو يعلمونا شناهي الوطنية حنا لي باقي حاصلين فبلاد الهايش مايش وغفل طارت عينيك، الأشكال لي كتخرج كل مرة باش زعمة تدافع على الوطن والصورة ديالو وعلى الملك، راه تسيئ لهاد الوطن ولملكه اكثر مما تدافع عنه، الى ناضت وحدة قررات تحرق الراية البلاد فراه لي ناضو ضدها ممختالفينش بزاف على تطرفها وتعصبها أو جهلها، أصلا فين ماتبان ليك ديك قوة الرايات والحمورية وبنادم مكشكش على الوطن عرف راه غير باغي حقو فالكاميلة، أما المواطنين ديال بصح فراه حرق راية أو حتى عشرة ماغادي يغير والو من شعورهم تجاه بلادهم.
أغلب المغاربة كاع ممسوق لهاديك لي حرقات الراية والا لهادوك لي دايرين مظاهرة في فرنسا على حب الوطن، آجي حبو معانا من هنا، اما من تم راه حتى الرحامنة تولي تبان بحال العروبية ديال سويسرا، الناس ملهية فمشاغلها اليومية وكتقلب على طرف ديال الخبز وكيفاش تحسن من جودة حياتها، أما حرق الراية او الدفاع عنها ره زايد ناقص عند بزاف، من غير طبعا لي واكلين الغلة ولي دايرين ديك الراية أصل تجاري كيبيعو ويشريو فيه هادوك هوما لي كيفضحو الدنيا بحب الوطن.