الحرب الباردة بدات بين الرابور الحر وزهير البهاوي.. وتدخلات كبيرة باش يطفيو العافية- فيديو

شهر من بعد إعلان خبر إصدار أغنية مشتركة بين الرابور “الحر” والمغني زهير البهاوي لي كانت مقررة تخرج في هاد شهر، تحديدا في 14 فبراير اي في “سان فالنتان” زعما، خرج هاد الأخير ودار أغنية بوحدو وخوا بالحر.
هاد البلان نوض الحرب الباردة بيناتهم. والتبركَيكَة لي جابت “كَود” أن أسماء كبيرة في الفن تدخلات باش تطفي العافية بين المغنين، بعدما خرج الحر ببوسط كيقول أنه مكانش كيتسنى منو هاد الخوية في عامرة.
الأصدقاء المشتركين وباش يجمعو الموضوع ويطويوه ويحبسو من القيل والقال، اقتارحو عليهم يديرو فيديو يحطوه للجمهور وبان الحر كيدوي مرتاح لكن البهاوي ماعاجبوش الحال.
وأكد مصدر “گود” أن الفيديو داروه غير باش مايبانش البهاوي دري صغير ومعندو كلمة، حيت في الأخير هو لي موفاش بالوعد لي عطاه لولد مدينتو.
View this post on Instagram
A post shared by Zouhair Bahaoui (@zouhairbahaoui) on Feb 4, 2020 at 9:35am PST