ضحايا “باب دارنا” دارو وقفة احتجاحية.. ومتضررة ل”كود”: كنطالبو الملك يتدخل باش يرجعو لينا فلوسنا

نظموا تقريبا 100شخص من المتضررين فمشروع “باب دارنا” الوهمي، اليوم السبت مع 11 ديال الصباح، وقفة احتجاجية فحي كاليفورنا فكازا، كايناشدو فيها الملك محمد السادس باش يتدخل باش ترجع ليهم فلوسهم.
الوقفة كانت فجوج مشاريع، مشروع ماجوريل 2 وجنان كاليفورنيا، وتهزات فيها لافتات من قبيل “ضحايا باب دارنا يطالبون المسؤولين بتفعيل الرسالة الملكية والتصدي لمافيا العقار”، و”أصحاب الأراضي شركاء فالقضية وهوما الوردي وعصابته”، و”نطالب جلالة الملك للتدخل العاجل لنصرة ضحايا باب دارنا”.
وقال وحدة من المشتكين فالملف، فتصريحها ل”كَود”: “حنا بغينا فلوسنا وجلالة الملك يتدخل فالموضوع، حنا كنلتجؤوا ليه ما كنلتجؤوا لحتى واحد، وكنطلبوه هو حيت هذو اللي شفرونا مايقدروش يرجعو لينا فلوسنا”.
وزادت “بغينا البوليس والشرطة العلمية يقلبو لينا على الفلوس، او يكونو ضغوطات باش نتوصلو بفلوسنا”.
وغير فالأسبوع اللي فات، نظمو مئات المتضررين فالملف وقفة احتجاجية بالعاصمة الفرنسية باريز، شاركو فيها افراد الجالية المقيمين فأوروبا.
وتبين للمتضررين فالملف بللي مشروع “باب دارنا” اللي حطو فيه الزبابل ديال الفلوس فالتسبيق باش يشريو شقق ديالهم كان مشروع على ورق فقط، وهذشي أدى لاعتقال 6 ديال المتهمين، وكيتعلق الأمر بمحمد الوردي، الرئيس المدير العام ديال المشروع، فضلا عن مدراء مكلفين بالتسويق والموثق اللي كيشرف على ملفات الحجز الأولي.