مازال المغاربة حاصلين فالشينوا: طالب ل”كود”: ماستطعناش نتيريو الفلوس اللي سافطو لينا واليدينا من البانكة باش نجيو للمغرب حيث كلشي هنا واقف

مازال بعض من الطلبة المغاربة حاصلين فالشينوا، حيت ماستاطعوش يجيو فالطيارة اللي وصلات مجموعة من المغاربة لبارح الثلاثاء للمغرب، واللي جاو خوفا من الإصابة بفيروس “كورونا” القاتل.
وطلقو الطلبة للي حصلو فمختلف المدن الصينية نداء استغاتة على تطبيق “واتساب”، من خلال نشر مجموعة من “الأوديوات”، اللي كايناشدو فيها الحكومة المغربية باش تشوف ليهم شي حل، بعدما مشات عليهم الطيارة اللولة.
يوسف مسعودي، الطالب المغربي اللي كيدرس بجامعة ليشوي الصينية واحد منهم، حيث تعذر عليه السفر مع زملائه لأنه ماستطعش يتيري الفلوس اللي سافطو ليه واليديه من البانكة.
وقال مسعودي، فتصريحو ل”كود” أن الحركة متوقفة تماما فالشينوا، والفلوس مكاينين فحتى شي بانكة، والناس ماكاتخرجش من الدار، أما المغاربة اللي رجعو جاو بفلوسهم، وحتى هوما ماستطعو يتيريو والو.
أكد الطالب المغربي أن مجموعة من المغاربة حاصلين بحالو، وقال “حاولنا بكل ما فوسعنا نتواصل مع الناس عبر مواقع التواصل الاجتماعي وتطبيق واتساب باش يسموعونا السلطات ويديرو لينا شي حل، كيف كانناشدو السفارة المغربية تساعدنا، ونتمناو هذ الازمة البنكية تتحل فاقرب وقت ونرجعو بحالنا”.
وقال أن المشهد فالشينوا مرعب، “الدنيا خاوية وحتى واحد ماكايدور فالزنقة، وحتى إلى خرجتي ممنوع تخرج بدون ماسك، وأغلب المحلات التجارية سادين، وكلشي هنا خايف هنا من الفيروس”.
وللإشارة، فمجموعة من المغاربة تم ترحيلهم إلى المغرب بمبادرة من الملك محمد السادس، ووضعهم تحت المراقبة الطبية لمدة 20 يوما، حتى يتم التأكد من عدم إصابتهم بالفيروس.
من جهتها، علنات وزارة الصحة، في بيان لها، أنه لم تسجل لحد الآن أي إصابة بفيروس “كورونا” فالمغرب، وأن كل ما تم تداوله في هذا الصدد مجرد إشاعات.