مازال زايدين فيه. من بعد اقتحام المجلس الوطني للصحافة.. “النجارة” قرروا يرفعوا دعوة قضائية ضد مجاهد.. ومصدر مسؤول من المجلس ل”كود”: من حق المجلس يطلب الديبلوم

علمت “كود” من مصادر خاصة بللي مجموعة من “النجارة”، اللي كايعتبرو راسهم صحافيين، قرروا يرفعوا دعوة قضائية ضد يونس مجاهد، رئيس المجلس الوطني للصحافة، فقط لأن هذ الأخير طلب منهم باش يجيبوا دوسيات طلب البطاقة المهنية مرفوقا بمجموعة من الوثائق، ومنها بالخصوص شهادة الإجازة.
وحسب المصادر نفسها، بغاو “النجارة” يرفعوا هذ الدعوة القضائية على مجاهد فقط لأن الإجازة مامطلوباش فالتجديد ديال بطاقة الصحافة، كيفما هو معلن عنه فالإعلان الرسمي، على أساس أن طلب الديبلوم بالنسبة ليهم “إخلال بالقوانين الجاري بها العمل فيما يخص تجديد البطائق المهنية”.
مصدر مسؤول من المجلس الوطني للصحافة صرح ل”كود” بللي من حق المجلس يطلب الديبلوم لبعض الأشخاص اللي عطاو إفادات فيها بعض الغموض على مستوى نوعية الديلبوم اللي عندهم، وبالتالي فطلبو “كيجي من باب التحقق، وبغية معرفة مزيد من المعلومات حول هؤلاء الصحافيين”، كيفما قال المصدر.
وهذشي وكايتافقو اللي ماخرجاتليهمش البطاقة هذ العام بسبب عدم توفرهم على ديبلوم، بتنظيم وقفة احتجاجية أمام مقر المجلس بحي الرياض.
وللإشارة فلبارح ناضت قربالة كبيرة فالمجلس الوطني للصحافة، من بعد ما اقتاحموا شي وحدين مكتب مجاهد وبداو يغوتوا، الشي اللي خلاه يعيط ليهم على البوليس اللي استمعوا لأقوالو فالموضوع.