اليوبي: راقبنا 21 ألف مسافر جا من برا باش نعرفو واش فيه “كورونا” ولا لا

أعلن محمد اليوبي، مدير مديرية الأوبئة ومحاربة الامراض، بللي تم مراقبة 21 ألف و 805 شخص بمختلف نقاط العبور فالمملكة.
وكشف اليوبي، خلال مناقشة موضوع “تداعيات انتشار وباء كورونا” في لجنة القطاعات الأنتاجية بمجلس النواب، صباح اليوم الجمعة، بلي تم لحد الآن التقصي بشأن 5 حالات مشتبه فيها فالحدود، واللي دارت التحاليل لمعرفة واش مصابة بالفيروس ولا لا.
وأفاد بللي نقاط العبور اللي كاينة فالمغرب واللي كتتبم مراقبة فيها الناس اللي كيدخلو للبلاد 33، وكتتمثل 16 لمطار، و14 ميناء، و3 ديال نقاط العبور البرية.
وكانو صحافيين، فالندوات التواصلية معاهم، سولوا وزارة الصحة ومدير مديرية الأوبئة على علاش ما تمش إلغاء الخطوط والرحلات اللي كتربط المغرب بالدول الموبوئة، لكن هذ الأخير أكد بللي هذشي ماشي من اختصاصهم وبللي اللجنة الوطنية للقيادة هي اللي كيمكن ليها تقرر.
وكان بلاغ مفبرك منسوب لوزارة الصحة دار ضجة كبيرة، كيتكلم على تعليق الخطوط الجوية بين المغرب والطاليان بعدما تفشى فهذ الأخيرة الفيروس، وهو البلاغ اللي خرج رئيس الحكومة كيكذبو فتدوينة ليه.
ولحد الساعة وصل عدد الحالات المشتبه فيها ل50 حالة فالمغرب، منها 48 حالة مستبعدة و2 حالات مؤكدة.