مزيان يسد المغرب حدودو مع الصبليون ولكن راه ما كافيش. خاصو يتقطع على العالم على الاقل لمدة شهر باش يواجه هاد الجايحة

المغرب قرر يسد حدودو مع الصبليون اللي دارت فيه “كورونا فيروس” حالة هاد اليومين. القرار جا وفق وكالة المغرب العربي للانباء “بتشاور مع السلطات الاسبانية، تعليق الرحلات الجوية والنقل البحري للمسافرين، من وإلى إسبانيا، حتى إشعار آخر”.القرار جا بعد مشاورات بين الملكين محمد السادس والملك فيليبي السادس ، مشاورات بهذا الخصوص، وذلك في أعقاب المبادلات التي جرت بين رئيسي الحكومتين ووزراء الداخلية والشؤون الخارجية في البلدين.
المغرب واسبانيا، البلدان الجاران والشريكان، يعملان بتنسيق تام من أجل التصدي لهذا الوباء العالمي.
هاد القرار مزيان ولكن جا معطل. علاش حقاش الجايحة محيحة فاسبانيا. قبل قليل هزات منطقة مدريد اللي عندها حكم ذاتي٬ الايقاع فمواجهة “كورونا فيروس”. منعات فيه لخروج والبركة فالتيراسات وسدات فيه بلايص الاطفال اللي كيلعبو فيها وطلبات المواطنين يبقاو فديورهم.
دول بحال امريكا والكويت والسعودية وعدد كبير من الدول منعات كاع الدول الاوربية٬ علاش حنا مازال فاتحين حدودنا مع فرانسا مع المانيا والنگليز ودول كثيرة اوربية راه الفيروس فشي دول ضارب مزيان.. خاص كلشي يتوقف. تعليق الحدود البرية والجوية مع الصبليون ماكافيش. خاص دابا اليوم قبل الغد اجراءات قوية خارجية واخرى داخلية.
داخليا خاص منع التجمعات اللي كانت دينية =الجمعة= او فنية او كروية وخاص يتسدو المدارس على الاقل لمدة 15 يوم. خاص لقهاوي يتسدو لمدة وكاع لمغاربة يبقاو فديورهم. السواق الا للضرورة. بهاد الشي وفهاد الوقت اللي ما عندناش بزاف الحالات ممكن نديرو الوقاية. راه الوقاية احسن من العلاج حقاش ما عندناش امكانية العلاج وثقافيا ايلى جات الجايحة غادية تضرب٬ وهاد الشي ما كنتمناوهش