للناس اللي حصلو فالمغرب وتغلقات عليهم الحدود بسباب “كورونا”.. سفارات فرانسا والصبليون والطاليان لقات ليهم الحلول

السفارات الإسبانية والفرنسية والإيطالية فالمغرب اقترحات حلول للناس اللي عايشين فهذ البلدان وبقاو حاصلين فالمغرب، بعدما تعلقات بشكل رسمي الرحلات ديال المغرب البحرية والجوية من وإلى هذ الدول الأوروبية الثلاث، بسبب انتشار فيروس “كورونا” المستجد والقاتل فيها.
ولهذشي، طلبات السفارة الفرنسية فالمغرب من جميع الأفراد اللي عايشين ففرانسا، (مغاربة أو فرانساويين أو من جنسيات أخرى) باش يلغيو السفر ديالهم للمغرب أو يأجلوه.
السفيرة الفرنساوية هيلين لوغال طلبات من اللي ساكنين ففرانسا ولي جاو للمغرب مؤخرا باش مايفكروش فالسفر، وإلا وإلى كان عندهوم غرض طارئ يتصلو بشركة الطيران أو منظمي الرحلات السياحية باش يشوفو واش الشروط ديالهم ملائمة قبل ما يرجعوهم لفرانسا.
ووضعات السفيرة رهن إشارة المغاربة المقيمين ففرانسا اللي حصلو فالمغرب أو اللي بغاو يجيو ليه رقم خاص بالأزمات واللي هو 05.37.689.789.
من جهتها، السفارة الإسبانية فالمغرب حتى هي تواصلات مع المقيمين بإسبانيا وجاو للمغرب وبقاو حاصلين، وقالت فبلاغ ليها بللي راها وضعات ترتيبات مع السلطات المغربية باش تسهل مغادرتهم للمغرب، وخصوصا منهم السياح الصبليونيين.
السفارة كتقوم الآن بتدارس هذ الإجراءات، وغادي توافي المعنيين بيها عبر شبكات التواصل الاجتماعي والقنصليات فالمغرب.
وغير قبل ما تدير السفارة الإسبانية والفرنسية فالمغرب الحل لهذ الناس، انتشرو بشكل كبير على مواقع التواصل الاجتماعي مغاربة واقفين بطوموبيلاتهم فالحدود، والجمارك مابغاوش يخليوهم يسافرو.
بالنسبة لسفارة إيطاليا، فمعطات حتى شي حل باش الناس اللي خصلو فالمغرب يرجعو للطاليان او العكس، لأن هذشي “يقدر يشكل خطر على الصحة العامة ويساهم كثر فانتشار الفيروس”، لكن اقترحات حلول للناس اللي خداو فيزا للطاليان من المغرب وماعندهومش كي يديرو يمددو مدتها، واكدات بللي بإمكانهم يديرو ملف جديد لفيزا جديدة من بعد ما تسالي الأزمة، بلا مايعاودو يسيفطو الوثائق، وماغايخلصو على هذشي والو.