الكلاخ هو لي كيخلي وحدين من المحتمل أنهم يكونوا مصابين بكورونا حيت كانو في منطقة وباء يشدو الطريق للمغرب هربا من الحجر الصحي تما.. والجهل هو لي مخلي وحدين مآمنين أنه ماغادي يوقع ليهم والو غير حيت مسلمين

الكلاخ والإستهتار هوما الوقود لي كيساعد كورونا على الإنتشار كثر، المغرب والعالم والبشرية كيواجهو فيروس قاتل معندوش علاج وغير معروف لشنو يمكن يتطور مستقبلا، والدولة دارت إجرائات إحترازية وخرجات بيانات ومع ذلك بنادم يالله مسوق للشريان وتخزين المواد الغذائية عوض يتسوق للوقاية وعدم الإختلاط والإزدحام، بنادم عكسي طبعا هادشي وقع فالعالم كامل وقلال الأمم لي ممراضش بهادشي بحكم هاد النظام الإقتصادي لي عايشين فيه راه عادية جدا هاد السلوكات ديال الأنانية والفردانية والجشع وهي أصلا محرك الإقتصاد، ولكن هاد قلة الثقة في الدولة وقلة الإلتزام بقراراتها وتعليماتها هي لي غادي تخلي الكارثة تحل عما قريب وتفاقم وتكون نتائجها مقودة كثر ملي كانت كون تم الإلتزام بتعليمات الدولة.
أقود من الفيروس هو الشائعات والأخبار الغالطة لي عند الناس عليه، بنادم ول لبارح بات كيتسنى الطيارات يرشو الدوى على المغاربة، وخبار خرى كتقوليك الجيش نزل في مراكش ودار مستشفيات ميدانية ودابا وساعة أوديوات من هنا ولهيه حول حالات مفترضة في عدة مدن، بالإظافة الى الأخبار الزائفة حول الفيروس وطبيعته وطريقة انتقاله، بنادم كيقوليك حنا مسلمين كنتوضاو خمسة ديال المرات فالنهار، وراه ييه النظافة كتحمي منو ولكن في نفس الوقت راه يمكن ينتاقل فالسطيلة ديال لوضو وفأي حاجة قاصها مصاب قبل منك وستعملتيها نتا من بعد مباشرة، حسب مكيظهر ليا من خلال التجمعات برا ، المغاربة خاص حتى يموت أحد الأقرباء ديالهم ويحسو براسهم أنهم مستهدفين بطريقة مباشرة داك الساعة عاد يفيقو من الكلبة، أما ماحد الأمور هاكة فراه غادي تكون شي كارثة وسبابها غير الجهل.
الجهل هو لي كيخلي وحدين من المحتمل أنهم يكونوا مصابين بكورونا حيت كانو في منطقة وباء أنهم يشدو الطريق للمغرب هربا من الحجر الصحي تما، والجهل هو لي مخلي وحدين مآمنين أنه ماغادي يوقع ليهم والو غير حيت مسلمين، والجهل هو لي مخلي الأسر مخرجة ولادها ومسافرين وحيت مكاينة قراية عايشين أجواء العطلة، والكلخ هو لي مخلي الناس باقين كيتسالمو ربعة دالبوسات وناشرين رجليهم فالقهاوي والبيران والجوامع، والكالاخ هو لي مخلي بزاف ديال المغاربة خالقين حالة رعب غير بوحدهم وماتايقينش فأرقام الدولة وكيظنو أنها مخبية عليهم الأرقام الحقيقية لي أكثر من الأرقام المعلن عنها بكثير، والكلخ هو لي مخلي الناس تكدس السلعة موحال حتى واش نافعة أو غادي يستعملوها، لذا إلى قدرات البلاد والعالم والإنسانية يتغلبو على هاد الأزمة فراه أول حاجة خاص الدولة تدير هي تحارب الكلخ لأنه معدي حتى هو ونتائجه قاتلة.