من بعد تفشي جائحة فيروس "كورونا" في العالم، ولا كلشي خايف على راسو وعائلتو، والناس توحشو زمن مكانش فيه بحال هذ الفيروسات كيدور، لكن وسط تداول الأخبار المقلقة، كاينين إيجابيات وأخبار سارة على الفيروس، اخترنا منهم 10، واللي هي: واحد: 99 فالمية مللي تصارو بالفيروس غادي يتشافاو، حيت غير بعض الناس اللي كتطور عندهم اعراض المرض، ففرانسا مثلا، كانو خرجو من الصبيطارات الفين مريض، وفدقة وحدة، فالشينوا كذلك تشافاو أكثر من 70 الف من أصل 81 ألف ديال المصابين. جوج: الشينوا ماسجلات حتى شي إصابة محلية بالفيروس فالايام الأربعة الماضية، بمعنى أن الحجر الصحي وعز المدن اللي تم اتباعو فالشينوا وفأغلب دول العالم يقدر يكونو عندو نتائج مزيانة. ثلاثة: عدد الوفيات فالعالم بالفيروس هو 1 فالمية، وهو اقل بكثير من نسبة وفياة المصابين بمتلازمة الالتهاب التنفسي الحادة واللي معروفة باس "سارس"، واللي كانت النسبة ديال المتوفين بيها 11 فالمية، وحتى "إيبولا" اللي كانت نسبتهم 90 فالمية. ربعة: الحكومات كلها فالعالم كتجري باش تحمي شعوبها، وكتعاون باش تلقى حلول طبية ودوا فعال لهذ المرض، ونسات النزاعات اللي كانت بينها، ترامب مثلا عرض على إيان مساعدات طبية، وروسيا وكوبا سافطو مستلزمات طبية لإيطاليا. خمسة: دول العام كتتضامن باش توصل لفاكسان ضد "كورونا"، وكان المدير العام لمنظمة الصحة العالمية تيدروس أدهانوم جيبريسوس، علن الأربعاء اللي فات على تجربة تضامن عبارة على دراسة بمشاركة عدة دول لتحليل علاجات غير مجربة، باش يسرعو البحث عن العلاجات والأدوية المحتملة لفيروس كورونا. ستة: ف16مارس، علن عالم المناعة أرتورو كاساديفال فصبيطار جونز هوبكينز بللي كاينة إمكانية أخذ الأجسام المضادة من مرضى فيروس كورونا واستخدامها لحقن الأشخاص المعرضين للخطر لكي تحميهم من الإصابة بالمرض، وهي وفقا للعالم البذرة الأولية لتصنيع اللقاح المنتظر. سبعة: ارتفاع نسبة العمل التطوعي فكَاع العالم، ففرانسا مثلا تسجلو 36 ألف متطوع من جميع الأعمار فاربعة ايام فقط، وتدارت مجموعة من المبادرات التضامنية، على مواقع التواصل الاجتماعي، باش توعي الناس وتساعدهم. ثمنية: ممكن يتم اكتشاف دواء ل"كورونا"، فالشينوا اختبار عقار ياباني، اسمه العلمي فافيبيرأفير، وأظهر فاعليته في تجارب سريرية بمدينة ووهان البؤرة الأولى لتفشي المرض، فميريكان وألمانيا طورو علاجات، وقدرو يتوصلو لخطة الفيروس فمهاجمة جهاز المناعة باش يحاولو يوصلو للدوا اللي غايقضي عليه. تسعود: نشرات مجلة نيتشر ميديسين العلمية بحث، كيقول بللي الباحثين الأستراليين يعملون على اختبار عقارين لفيروس كورونا، وتوصلوا حتى هوما للخطة الفيروس في محاربة جهاز المناعة مما يفيد في التقدم للوصول لدوا فعال. عشرة: انخفضات نسبة التلوث الهوائي بشكل ملحوظ فالعالم، خصوصا فالشينوا، اللي هي من الدول الأكثر تلوث فالعالم، حيت سجلات انحسار ملحود فثاني أكسيد النيتروجين السام، كذلك الشأن بالتسبة لإيطاليا اللي انخفضات فيها نسبة التلوث حتى ل30 فالمية.
