من بعد ما دارت فيديو سبات فيه كَاع المسؤولين والإداريين ديال كلينيك "لونشون" فكازا، واتهماتهم بأنهم بغاو ينصبو على صاحبتها اللي مريضة ب"كوفيد 19″ وطلبو ليها 2 مليون، خرجات سارة بيرلس، وهي ممثلة مغربية برتغالية عايشة ففرانسا، كتعتذر ففيديو آخر ليها على كَاع الهضرة اللي قالت، واعترفات بالخطأ ديالها. سارة مؤخرا خرجات بفيديو جديدة حطاتها فالسطوري ديال حسابها على "الأنستكَرام"، كتعترف فيها بللي زادت فيه بزاف، وخسرات الهضرة، ومكانش عليها تتصرف بديك الطريقة، وقالت بللي صاحبتها مشات لصبيطار مولاي يوسف، وحالتها تحسنات ورجعات للدار، ودابا ولات تتنفس بشكل عادي نوعا ما. وباش تتحقق كثر من هذ الواقعة وحيثياتها، اتصلات "كود" كذلك برشدي طالب، مدير العام للهولدينكَ الصحي "أكديطال" اللي تابع ليه كلينيك "لونشون"، باش تاخد الإفادة ديالو فالموضوع، وقال بللي هذاكشي كلو كذوب، وبللي الكلينيك مكايستقبلش المصابين بالفيروس أصلا، وحتى إلى جا شي واحد فيهم أو شي حالة مشكوك فيها، فكيسيفطها لسبيطار مولاي يوسف. وزاد طالب كيقول فتصريحو بللي صاحبة الممثلة ماعندها والو، ومامصاباش أصلا بالفيروس، "بحيت حنا منين سيفطناها للسبيطار مولاي يوسف دارت التحاليل، ومالقاو عندها والو، ورجعات بحالها لدارهم، هذشي راه قالتو السيدة فالفيديو اللي اعتذرات فيها، واخا كان اعتذارها ناقص وكان خصها تعتذر بذكر الأسماء اللي تاهماتهم بدوو دليل"، على حساب هضرتو. ونفى المدير العام نفي قاطع أنهم يكونو طلبو لفلوس لشي حد مصاب بكورونا، أو شدوه عندهم باش يتعالج صوا فالإنعاش أو فغرفة عادية، على اعتبار أن كلينيك "لونشون" غير مرخصة باش تدير شي حاجة من هذ القبيل. وتواصلات "كود" كذلك مع المندوبية الجهوية للصحة فكازا سطات، نبيلة الرميلي، باش تسولها على الكلينيكات اللي كيستقبلو مرضة "كوفيد 19″، وقالت بللي كاينين 3 ديال الكلينيكات فقط اللي كيعالجو هذ المرضى فكازا، من ضمنهم كلينيك الرازي ديال "لاسينيسيس"، وجوج كلينيكات خرين خاصين، لكن تابعين لوزارة الصحة، وصرحات بللي كلينيك "شون لون" ماداخلش ضمنها. وأكدات الرميلي بللي أي كلينيك استقبل مرضى كورونا من غير هذ الثلاثة، سوا طلب ليهم الفلوس أو لا، راه غايكون كيخالف القوانين، وغايكون المصير ديالو هو السدان، والمسؤولين عليه غادي يتحاسبو. وللإشارة، حطات الممثلة الشابة فيديو هذي شي ثلث يام، كتقول فيه بللي الناس ديال الكلينيك تكرفصو على صاحبتها اللي مريضة بفيروس كورونا المستجد، وبغاو ينصبو عليها منين طلبو منها 20 ألف درهم كتسبيق باش يشدوها عندهم ويعالجوها، ومنين قالت ليهم بللي هذشي غالي، دارو ليها خصم ديال النص فالثمن. وكشفات سارة، فالفيديو اللي كانت دارتو حتى هو ف"أنستكَرام" بللي صاحبتها فواحد الحالة صعيبة، وفالكلينيك مابغاوش يحطوها فالإنعاش حتى تخلص الفلوس، وهي بقات كاتكحب بزاف، وكان عندها صعوبة ديال التنفس، وبسباب هذشي بدات سارة تغوت وتخسر الهضرة، وطلبات بوضع شكاية ضد مدير الكلينيك.
