جابها فراسو.. عريضة متابعة الفايد بتهمة "انتحال صفة طبيب" فاتت سقف 2050 توقيع بين البارح واليوم

غير بين لبارح واليوم، العريضة اللي داروها مجموعة من الأطر الطبية، ووقعوها ونشروها نشطاء على نطاق واسع فمواقع التواصل الاجتماعي، من أجل متابعة محمد الفايد بسبب انتحالو لصفة طبيب، تجاوزات هذ الصباح سقف 2050 توقيع.
النشطاء طالبو، من خلال هذ العريضة الإلكترونية اللي حطوها فموقع "تشينج.أوركَ، باش تتم متابعة الفايد وفقا للظهير الشريف رقم 1.15.26 الصادر ف15 فبراير 2015 الخاص بتنفيذ القانون رقم 131.13 المتعلق بمزاولة مهنة الطب، وخصوصا منو المواد 108 و109.
وكتنص المادة 108 من هذ القانون على أن كل من قام بتشخيص أو علاج أمراض، عن طريق استشارات شفوية ومكتوبة بأي طريقة، بلا ماتكون عندو شهادة كتخول ليه هذشي، كيتسمة منتحل صفة الطبيب، أو مزاول للمهنة بوجه غير قانوني.
ومادة 109 من نفس القانون كتقول: "يعاقب على مزاولة الطب بوجه غير قانوني في الحالات المنصوص في البندين 1 و 5 من المادة 108 أعلاه ، بعقوبة الحبس من ثلاثة أشهر إلى خمس سنوات ، وبغرامة من 10000 درهم إلى 100000 درهم".
وكانت طبيبة من مدينة وجدة سميتها سناء إسماعيل رفعات دعوى قضائية إلكترونية ضد الفايد لمتابعته بنفس التهمة، وقالت فتدوينة ليها على مواقع التواصل الاجتماعي "فيسبوك" بللي هذا هو اللي كيملي عليها ضميرها، وهذا واجبها تجاه بلادها، من بعد ما عيق الفايد فإعطاء النصائح والتوجيهات اللي ممكن يضر بيها الناس فزمن تفشي وباء كورونا المستجد فالعالم.
وموسوعة "ويكيبيديا" قامت بدورها بحذف السيرة الذاتية المتعلقة بمحمد الفليد، بعدما تضح ليها بللي كتحمل معلومات مغلوطة ومشكوك فيها، ومكاتنطبقش مع معايير السيرة الذاتية المعمول بها فالموسوعة.
الفايد، اللي كيعتبر راسو خبير فالطب البديل والتغذية والتداوي بالأعشاب، استغل هذ الظرفية ديال فيروس كورونا باش يمارس الهواية ديالو المفضلة، ويبدا يعطي استشارات طبية من السماوي بحال العادة، لكن هذ المرة هذشي كيشكل تهديد كبير على الصحة العامة، بحكم انه قال بللي الصيام ممكن يقضي على كورونا، والقرفة والقرنفل يمكن تحيد الفيروس من الجوب الأنفية والمسالك التنفسية، ومؤخرا دار إشهار لشي مضادات حيوية مامعروفاش وقال انها اكثر نجاعة وممكن تقوي المناعة أكثر من أي مضادات أو أدوية اخرى.
وهادي عريضة متابعة الفايد:
https://www.change.org/p/%D8%B1%D8%A6%D8%A7%D8%B3%D8%A9-%D8%A7%D9%84%D9%86%D9%8A%D8%A7%D8%A8%D8%A9-%D8%A7%D9%84%D8%B9%D8%A7%D9%85%D8%A9-%D8%A8%D8%A7%D9%84%D9%85%D9%85%D9%84%D9%83%D8%A9-%D8%A7%D9%84%D9%85%D8%BA%D8%B1%D8%A8%D9%8A%D8%A9-%D9%85%D8%AA%D8%A7%D8%A8%D8%B9%D8%A9-%D9%85%D8%AD%D9%85%D8%AF-%D8%A7%D9%84%D9%81%D8%A7%D9%8A%D8%AF-%D8%A8%D8%AA%D9%87%D9%85%D8%A9-%D8%A7%D9%86%D8%AA%D8%AD%D8%A7%D9%84-%D8%B5%D9%81%D8%A9-%D8%B7%D8%A8%D9%8A%D8%A8-%D9%88%D8%AA%D8%B9%D8%B1%D9%8A%D8%B6-%D8%A7%D9%84%D9%86%D8%A7%D8%B3-%D9%84%D9%84%D8%AE%D8%B7%D8%B1-%D8%A8%D8%B3%D8%A8%D8%A8-%D9%86%D8%B5%D8%A7%D8%A6%D8%AD%D9%87-%D8%BA%D9%8A%D8%B1-%D8%A7%D9%84%D9%85%D8%AE%D8%AA%D8%B5%D8%A9?recruiter=1077333349&utm_source=share_petition&utm_medium=facebook&utm_campaign=psf_combo_share_abi&utm_term=share_for_starters_page&recruited_by_id=6986c670-80f3-11ea-8c31-2bfb705fc3d8