"نتوما ماشي شعركم.. نتوما عقلكم وقرايتكم وذكائكم. من بعد ميساج عبير عابد القوي للعيالات.. بزاف اتافقو معاها وشجعوها -تدوينة

المغنية عبير عابد دوزات هاد اليوماين ميساج رائع، كيف كتبنا ف"كود"، فيه ان العيالات ماشي هما الشعر والمظهر، بل هما دماغهم وذكائهم وقرايتهم.
وكتبات عبير فالتصويرة لي حطات مقرعة شعرها على حسابها في انستكَرام: رسالة مني لكل مرأة أو بنت، كتعاني مع المجتمع لي كيبغي يفرض عليها بعض الأفكار لي هي وهمية و من اختراع البشر و الشعوب ..
جيت اليوم نتضامن مع راسي و مع أي بنت كذبو عليها فيوم من الأيام و قالولها بلي إذا ما كانش عندك الشعر أنت ماشي مرا، و شحال من وحدة تعقدات أو دارت الزيف باش تغطي أو باروكا،غير حيت شعرها كيطيح، أو حرش، أو مرضات بالسرطان و ما قدراتش تقبل راسها قرعة حيت الناس غادي يضحكوا عليها .. البنات سمعوني مزيان، سر جمالك هو عقلك، و كيانك، و ذكائك، و مستواك الفكري و أخلاقك، و فلوسك و عملك، و قلبك و نيتك و أهم حاجة ابتسامتك و ثقتك بنفسك .. هادي هي قيمتك، ماشي شعرك، أو جسمك .. خليك قوية رغم كلام الناس لي ما غادي يفيدك فوالو..
واضافت عبير : من الآن فصاعدا، سمعي لقلبك، و ديري داكشي لي أنت مقتانعة به، مدام ما كيمس الحرية ديال حتى شئ واحد ولا كيخدش الحياء، أما بالنسبة لداك الناس لي غادي يضحكو عليك ما تديهاش فيهم، واش كاين شي إنسان عاقل،واعي و عندو قيمة فالمجتمع،كيعطي رأيه فالناس بلا ما حتى واحد يطلب منه؟؟!!! طبعًا لا، هادوك كلهم ناس حياتهم فارغة عليها كيهتمو بمشاكل و حياة الناس .. آخر كلمة أنت فتاة إذا أنت مركز الكون بشعرك أو بلاش..
بزاف ديال الناس شجعوها على موقفها، وكتبو ليها تعليقات زوينة منها: